അർണബിനെതിരെ നിയമോപദേശം തേടി മഹാരാഷ്ട്ര സർക്കാർ

നാഗ്പൂർ: ബാലക്കോട്ട് നടന്ന വ്യോമാക്രമണവുമായി ബന്ധപ്പെട്ട് റിപ്പബ്ലിക് ടിവി മേധാവി അർണബ് ഗോസ്വാമി നടത്തിയ വാട്സാപ്പ് ചാറ്റുകൾ സംബന്ധിച്ച് ഒഫീഷ്യൽ സീക്രട്ട് ആക്ട് അനുസരിച്ച് നടപടിയെടുക്കാൻ കഴിയുമോയെന്ന് മാഹാരാഷ്ട്ര സർക്കാർ നിയമോപദേശം തേടുന്നതായി ആഭ്യന്തര മന്ത്രി അനിൽ ദേശ്മുഖ്.

തന്ത്രപ്രധാനമായ വിവരങ്ങൾ അർണബിന് എങ്ങനെ ലഭിച്ചുവെന്നതു സംബന്ധിച്ച് കേന്ദ്രസർക്കാരിനോടു ചോദിക്കാൻ ഞങ്ങൾ ആഗ്രഹിക്കുകയാണ്. പ്രധാനമന്ത്രി, ആഭ്യന്തര മന്ത്രി, കരസേന മേധാവി, തെരഞ്ഞെടുക്കപ്പെട്ട കുറച്ച് ആളുകൾ, എന്നിവർക്കു മാത്രമേ ഇക്കാര്യങ്ങൾ അറിയൂ. ഈ വിഷയം ദേശീയ സുരക്ഷയുമായി ബന്ധപ്പെട്ടതാണെന്നും കേന്ദ്രം മറുപടി പറയണമെന്നും അനിൽ ദേശ്മുഖ് പറഞ്ഞു.

1923 ലെ ഒഫീഷ്യൽ സീക്രട്ട് ആക്ട് പ്രകാരം അർണബിനെതിരെ നടപടിയെടുക്കാൻ സംസ്ഥാന സർക്കാരിനു കഴിയുമോയെന്നാണ് മഹാരാഷ്ട്ര സർക്കാർ പരിശോധിക്കുന്നത്. 2019 ഫെബ്രുവരി 14 ന് നടന്ന പുൽവാമ ആക്രണത്തിനു ശേഷം ഫെബ്രുവരി 26 ന് പാക്ക് അധീന കാശ്മീരിലെ ബാലാക്കോട്ട് നടത്തിയ വ്യോമാക്രമണത്തെക്കുറിച്ചാണ് അർണബ് വാട്സാപ്പ് ചാറ്റിൽ പറയുന്നത്.

അർണബും ബാർക്ക് മുൻ സിഇഒ പാർത്തോ ദാസ്ഗുപ്തയും തമ്മിലുള്ള വാട്സാപ്പ് സംഭാഷണത്തിന്റെ വിവരങ്ങളാണ് പുറത്തുവന്നത്. ബാലാക്കോട്ട് ആക്രമണത്തിനു മൂന്നു ദിവസം മുമ്പ് അർണബിന് ആക്രണത്തെക്കുറിച്ച് വിവരം ലഭിച്ചിരുന്നുവെന്നാണ് വാട്സാപ്പ് ചാറ്റുകൾ വ്യക്തമാക്കുന്നത്.