സ്വതന്ത്ര എംഎൽഎമാർ ബിജെപിയിലേക്കെന്ന് ഫഡ്നാവിസ്; 50:50 ഓർമ്മിപ്പിച്ച് ഉദ്ധവ് താക്കറെ

മുംബൈ: മഹാരാഷ്ട്രയിലെ 15 സ്വതന്ത്ര എംഎൽഎമാര്‍ ബിജെപിയിലേക്ക് ചേരുമെന്ന് മുഖ്യമന്ത്രി ദേവേന്ദ്ര ഫഡ്നാവിസ്. ഇവര്‍ ബിജെപി-ശിവസേന സഖ്യത്തിനൊപ്പം കൂടാൻ തയ്യാറാണെന്ന് അറിയിച്ചുവെന്നും ഫഡ്നാവിസ് വ്യക്തമാക്കി.



ശിവസേനയുമായി തീരുമാനിച്ചതുപോലെ തന്നെ മുന്നോട്ട് പോകും. തീരുമാനങ്ങള്‍ കൃത്യമായ സമയത്ത് എല്ലാവരും അറിയും. തെരഞ്ഞെടുപ്പിൽ പിന്തുണച്ച എല്ലാ ജനങ്ങളോടും നന്ദി അറിയിക്കുന്നു. എന്നാൽ രണ്ട് മണ്ഡലങ്ങളിലെ പരാജയം ഞെട്ടിക്കുന്നതാണ്. ഞങ്ങളുടെ രണ്ട് മന്ത്രിമാര്‍ തെരഞ്ഞെടുപ്പിൽ പരാജയപ്പെട്ടു. ഇതിൻ്റെ കാരണങ്ങള്‍ നാളെ മുതൽ പരിശോധിച്ച് കണ്ടുപിടിക്കും. ഇന്ന് വിജയാഘോഷത്തിനുള്ള ദിനമാണെന്നും അദ്ദേഹം പറഞ്ഞു. ബിജെപിക്ക് വളരെ കുറച്ച് സീറ്റിൽ മാത്രമേ വിജയിക്കാൻ സാധിച്ചിട്ടുള്ളുവെന്നും ഫഡ്നാവിസ് കൂട്ടിച്ചേര്‍ത്തു.

അതേസമയം സര്‍ക്കാര്‍ രൂപീകരിക്കുമ്പോള്‍ 50:50 ഫോര്‍മുല നടപ്പാക്കണമെന്ന് ശിവസേന അധ്യക്ഷൻ ഉദ്ധവ് താക്കറെ ആവശ്യപ്പെട്ടു. നേരത്തെ ഇത് അംഗീകരിച്ചതാണെന്നും നിലവിൽ ഫോര്‍മുല നടപ്പാക്കാനുള്ള സമയമാണെന്നും അദ്ദേഹം വ്യക്തമാക്കി. മഹാരാഷ്ട്ര നിയമസഭാ തെര‍ഞ്ഞെടുപ്പിൽ ബിജെപി 164 സീറ്റിലും ശിവസേന 124 സീറ്റിലുമാണ് മത്സരിച്ചത്. ഇതുവരെ ഔദ്യോഗിക ഫലം പുറത്തുവന്നിട്ടില്ല. ബിജെപി-സേന സഖ്യം 159 സീറ്റിൽ ലീഡ് ചെയ്യുകയാണ്. കോൺഗ്രസ് സഖ്യം 105 സീറ്റിലും മറ്റുള്ളവര്‍ 24 സീറ്റിലും ലീഡ് നിലനിര്‍ത്തുകയാണ്.