UPDATED: #MeToo ഞങ്ങളുടെ നയം

#MeToo ക്യാംപയ്‍നിനെ സമയം മലയാളം പിന്തുണയ്‍ക്കുകയും ബഹുമാനിക്കുകയും ചെയ്യുന്നു. സമൂഹത്തിന്‍റെ വിവിധ തലങ്ങളിലുള്ള ധൈര്യശാലികളായ സ്ത്രീകള്‍ തുറന്നുപറയുന്ന ലൈംഗിക അതിക്രമ ആരോപണങ്ങള്‍ അതേ ഗൗരവത്തോടെ ഞങ്ങള്‍ റിപ്പോര്‍ട്ട് ചെയ്യുന്നുണ്ട്.

ഇന്ത്യയില്‍ ഏറ്റവും അധികം വായനക്കാരിലേക്ക് എത്തുന്ന മാധ്യമസ്ഥാപനം എന്ന നിലയ്‍ക്ക് ഈ വിഷയം കൈകാര്യം ചെയ്യുന്നതില്‍ ഞങ്ങള്‍ അതീവ ശ്രദ്ധാലുക്കളാണ്. നീതിപൂര്‍വമായ വാര്‍ത്തകളാണ് ഈ വിഷയത്തില്‍ എഴുതുന്നതെന്ന് ഞങ്ങള്‍ ഉറപ്പുവരുത്തുന്നു. ഇത് ഉറപ്പുവരുത്താന്‍ സോഷ്യല്‍ മീഡിയ വെബ്‍സൈറ്റുകളില്‍ അനോണിമസ് (ഐഡന്‍റിറ്റി വെളിപ്പെടുത്താത്തവ) അക്കൗണ്ടുകളില്‍ നിന്നുള്ള ലൈംഗിക അതിക്രമ ആരോപണങ്ങള്‍ റിപ്പോര്‍ട്ട് ചെയ്യാതിരിക്കാന്‍ ഞങ്ങള്‍ തീരുമാനിച്ചിട്ടുണ്ട്.

അനോണിമസ് അക്കൗണ്ടുകളില്‍ നിന്നോ വിവരം സ്ഥിരീകരിക്കാന്‍ കഴിയാത്ത ട്വിറ്റര്‍, ഫേസ്‍ബുക്ക്, ഇന്‍സ്റ്റഗ്രാം അക്കൗണ്ടുകളില്‍ നിന്നോ ഉള്ള വിവരങ്ങള്‍ പ്രസിദ്ധീകരിക്കുന്നതല്ല. ഇത്തരം പ്ലാറ്റ്‍ഫോമുകളിലൂടെ ആളുകളെ മനപൂര്‍വം അപകീര്‍ത്തിപ്പെടുത്താനുള്ള സാധ്യതകള്‍ ഉള്ളതിനാലാണ്.

സ്വന്തം ഐഡന്‍റിറ്റി വെളിപ്പെടുത്താതെ തങ്ങളുടെ ദുരനുഭവങ്ങള്‍ പങ്കുവയ്‍ക്കുന്നവര്‍ ഉണ്ടെന്ന് ഞങ്ങള്‍ മനസിലാക്കുന്നു. ഭയം, സുരക്ഷ, സ്വകാര്യത തുടങ്ങിയ പ്രശനങ്ങള്‍ അവരെ അലട്ടുന്നുണ്ടാകാം. എങ്കിലും, ഞങ്ങളുടെ പ്ലാറ്റ്‍ഫോമുകളിലൂടെ മീടൂ പോലെ ഒരു ക്യാംപയ്‍ന്‍ ദുരുപയോഗിക്കപ്പെടാന്‍ ആഗ്രഹിക്കുന്നില്ല. തെറ്റായതോ, ദുരുദ്ദേശത്തോടെയുള്ളതോ, അപകീര്‍ത്തികരമോ ആയ പോസ്റ്റുകള്‍ പ്രോത്സാഹിപ്പിക്കുന്നില്ല.

അതിക്രമത്തിനിരയായവർക്കു വേണ്ടി മൂന്നാമതൊരാൾ നടത്തുന്ന വെളിപ്പെടുത്തലുകൾ ഞങ്ങൾ പ്രസിദ്ധീകരിക്കുന്നതല്ല. അതായത്, അതിക്രമത്തിനിരയായവരുടെ ഐഡൻ്റിറ്റി വെളിപ്പെടുത്താതെ മൂന്നാമതൊരാൾ ഒരാളുടെ മേൽ ഉന്നയിക്കുന്ന ആരോപണങ്ങൾ സംബന്ധിച്ച വാർത്തകളും പ്രസിദ്ധീകരിക്കുന്നതല്ല.

അതായത്, ഞങ്ങളുടെ പ്ലാറ്റ്‍ഫോമിലൂടെ സ്വന്തം ഐഡന്‍റിറ്റി വെളിപ്പെടുത്താതെ ഉന്നയിക്കുന്ന ആരോപണങ്ങള്‍ റിപ്പോര്‍ട്ട് ചെയ്യുന്നതല്ല. വ്യക്തിയോ അവരെ ഉള്‍ക്കൊള്ളുന്ന പ്രസ്ഥാനമോ സ്വയം മുന്നോട്ടു വരുന്ന പക്ഷം, വാര്‍ത്ത സത്യമാണെന്ന് ബോധ്യപ്പെട്ടാല്‍ തീര്‍ച്ചയായും ആരോപണം റിപ്പോര്‍ട്ട് ചെയ്യുന്നതാണ്.

മറ്റു വാര്‍ത്ത സ്ഥാപനങ്ങള്‍, വെബ്‍സൈറ്റുകള്‍, ടിവി ചാനലുകള്‍ എന്നിവ ഇത്തരം ആരോപണങ്ങള്‍ റിപ്പോര്‍ട്ട് ചെയ്‍തേക്കാം. പക്ഷേ, ഞങ്ങള്‍ റിപ്പോര്‍ട്ട് ചെയ്യുന്നതല്ല. ഇന്ത്യയിലെ ഏറ്റവും വലിയ മാധ്യമ സ്ഥാപനം എന്ന നിലയില്‍ നൈതികമായ റിപ്പോര്‍ട്ടിങ് ആണ് #MeToo വിഷയത്തില്‍ ഞങ്ങള്‍ സ്വീകരിക്കുന്നത്.

എന്നാല്‍ അതിക്രമത്തിന് ഇരയായ വ്യക്തി ഞങ്ങളുടെ സ്ഥാപനത്തെ നേരിട്ട് സമീപിച്ച് വാര്‍ത്ത തരികയാണെങ്കില്‍, അവരുടെ നിര്‍ദേശപ്രകാരം അവരുടെ ഐഡൻ്റിറ്റി വെളിപ്പെടുത്താതെ ഞങ്ങൾ വാര്‍ത്ത നല്‍കിയേക്കാം. അതിക്രമത്തിന് ഇരയായ വ്യക്തി നേരിട്ട് നൽകുന്ന വെളിപ്പെടുത്തലാകയാൽ, അവരുടെ പേര് വെളിപ്പെടുത്തണമോ വേണ്ടയോ എന്നത് വ്യക്തിയുടെ തീരുമാനത്തിന് മുൻതൂക്കം നൽകി അതിനനുസരിച്ച് പ്രസിദ്ധീകരിക്കുന്നതായിരിക്കും. പേര് വെളിപ്പെടുത്തണ്ട എന്നാണ് വ്യക്തിയുടെ തീരുമാനമെങ്കിൽ അതിനെ ഞങ്ങൾ തീര്‍ച്ചയായും മാനിക്കുന്നതായിരിക്കും.

കൂടാതെ, ഇത്തരം വാര്‍ത്ത മറ്റൊരു മാധ്യമത്തിൽ പ്രസിദ്ധീകരിച്ചാൽ ആ മാധ്യമത്തെ ഉദ്ധരിച്ച് സമയം മലയാളവും വാ‍ര്‍ത്ത നല്‍കും. ഇത്തരം വാ‍ര്‍ത്തകൾക്ക് അര്‍ഹിക്കുന്ന പ്രാധാന്യം നല്‍കി ജനങ്ങളിലേക്ക് എത്തിക്കുക എന്ന ഉദ്യമത്തിന്‍റെ ഭാഗമായി, മറ്റ് മാധ്യമങ്ങൾ പുറത്തു വിടുന്ന വാര്‍ത്തകളും, അവയുടെ സ്രോതസിനെ വ്യക്തമായി ഉദ്ധരിച്ച്കൊണ്ട്, ഞങ്ങൾ പ്രസിദ്ധീകരിക്കും.

ബിസിസിഎല്‍, എല്ലാവര്‍ക്കും സുരക്ഷിതമായി ജോലി ചെയ്യുന്നതിനുള്ള അന്തരീക്ഷമുള്ള സ്ഥാപനമാണ്. വളരെ ദൃഢമായ POSH നയം അത് പിന്തുടരുന്നു. തൊഴില്‍ സ്ഥലത്തെ ലൈംഗിക അതിക്രമങ്ങള്‍ക്ക് നേരെ ഒരു വിട്ടുവീഴ്‍ച്ചയുമില്ലാത്ത നടപടികളും സ്വീകരിക്കുന്നുണ്ട്.