എയർ ഇന്ത്യ വിമാനത്തിൽ കഞ്ചാവു കടത്ത്; മലയാളി ഉദ്യോഗസ്ഥൻ പിടിയിൽ

ന്യൂഡല്‍ഹി: എയർ ഇന്ത്യ വിമാനത്തിലൂടെ കഞ്ചാവ് കടത്തിയതിന് മലയാളി ഉദ്യോഗസ്ഥൻ ഡൽഹി വിമാനത്താവളത്തിൽ പിടിയില്‍‍. ദുബായ്– ചെന്നൈ– ഡൽഹി വിമാനത്തിൽ നിന്നാണ് രണ്ടര കിലോ കഞ്ചാവ് പിടികൂടിയത് . ഭക്ഷണം വിതരണം ചെയ്യുന്ന കാറ്ററിങ് ട്രോളിയിലാണ് കഞ്ചാവു പൊതി കണ്ടെത്തിയത്.

ഒരു മാസത്തിലധികമായി ഡല്‍ഹി കസ്റ്റംസ് നടത്തിയ അന്വേഷണത്തിനൊടുവിലാണ് മലയാളി ക്യാബിൻ ക്രൂ ഉദ്യോഗസ്ഥൻ കുറ്റക്കാരനാണെന്ന് കണ്ടെത്തിയത്. വിമാനത്തിലൂടെ എത്രകാലമായി കഞ്ചാവു കടത്തുകയായിരുന്നുവെന്നും മറ്റാരെങ്കിലും ഉൾപ്പെട്ടിട്ടുണ്ടോയെന്ന് അറിയുന്നതിനും സംഭവത്തിൽ വിശദമായ അന്വേഷണം പ്രഖ്യാപിച്ചിട്ടുണ്ട്.

സംഭവത്തിനു പിന്നിൽ ഏതെങ്കിലും ഏജന്റുമാരുണ്ടോ, എവിടെ നിന്നാണ് കഞ്ചാവ് എത്തുന്നത് എന്നതും പരിശോധിച്ചു വരികയാണ്. കൂടുതല്‍ എയര്‍ ഇന്ത്യ ജീവനക്കാര്‍ ലഹരികടത്തില്‍ ഉള്‍പ്പെട്ടതായി കസ്റ്റംസ് സംശയിക്കുന്നുണ്ടെന്നാണ് സൂചന. വരുംദിവസങ്ങളില്‍ കൂടുതല്‍ ജീവനക്കാരെ ചോദ്യംചെയ്യും.

Malayalee official detained for carrying ganja in Airindia flight

A Malayalee official has been detained at the Delhi airport for smuggling ganja by airplane