ചന്ദ്രയാന്‍ 2:സാമ്പത്തിക മാന്ദ്യത്തില്‍ നിന്ന് ശ്രദ്ധ തിരിക്കാനുള്ള ശ്രമം; ബി.ജെ.പി.ക്കെതിരെ മമതാ ബാനര്‍ജി

കൊല്‍ക്കത്ത: ചന്ദ്രയാന്‍ 2 വിക്ഷേപണത്തിന് അമിത പ്രാധാന്യം നല്‍കുന്നത് സാമ്പത്തിക മാന്ദ്യത്തില്‍ നിന്ന് രാജ്യത്തിന്‍റെ ശ്രദ്ധ തിരിക്കാനാണെന്ന ആരോപണവുമായി ബംഗാള്‍ മുഖ്യമന്ത്രി മമതാ ബാനര്‍ജി.

രാജ്യത്ത് ആദ്യമായാണ് ചന്ദ്രയാന്‍ വിക്ഷേപണം നടക്കുന്നത് എന്നതുപോലെയാണ് സര്‍ക്കാരിന്‍റെ നടപടികളെന്നും തൃണമൂല്‍ കോണ്‍ഗ്രസ് നേതാവായ മമത കുറ്റപ്പെടുത്തി. ബംഗാള്‍ നിയമസഭയില്‍ ദേശീയ പൗരത്വ പട്ടികയ്‍ക്കെിരായ പ്രമേയത്തിന്‍മേലുള്ള ചര്‍ച്ചയ്ക്കിടെയാണ് മമത ബി.ജെ.പി. സര്‍ക്കാരിനെതിരെ ആഞ്ഞടിച്ചത്.

രാജ്യത്ത് ഇതിനുമുമ്പ് ചന്ദ്രയാന്‍ വിക്ഷേപണം നടന്നിട്ടില്ലാത്തതുപോലെയാണ് മോദി സര്‍ക്കാരിന്‍റെ നീക്കങ്ങള്‍. ഈ സര്‍ക്കാര്‍ വരുന്നതിനുമുമ്പും ഇവിടെ ബഹിരാകാശ ഗവേഷണങ്ങള്‍ നടന്നിട്ടുണ്ട്. ഈ സര്‍ക്കാര്‍ വന്നതിനുശേഷം മാത്രം നടന്ന കാര്യങ്ങളാണ് ഇവയെല്ലാം എന്ന തരത്തിലാണ് പ്രചാരണം. ഇതെല്ലാം ജനങ്ങളുടെ ശ്രദ്ധ തിരിക്കാനുള്ള ശ്രമത്തിന്‍റെ ഭാഗമാണ്.- മമത ബാനര്‍ജി പറഞ്ഞു.

2008 ഒക്ടോബര്‍ 22ന് വിക്ഷേപിച്ച ചന്ദ്രയാന്‍ 1 ദൗത്യം 2009 ഓഗസ്റ്റ് 29 വരെ പ്രവര്‍ത്തനക്ഷമമായിരുന്നു.