മോദിക്ക് നേരെ രാസാക്രമണം നടത്തുമെന്ന് ഭീഷണി;യുവാവ് അറസ്റ്റില്‍

മുംബൈ: പ്രധാനമന്ത്രി നരേന്ദ്ര മോദിക്ക് നേരെ രാസാക്രമണം നടത്തുമെന്ന് ഭീഷണി. ഭീഷണി മുഴക്കിയ ജാര്‍ഖണ്ഡ് സ്വദേശിയായ യുവാവിനെ പോലീസ് അറസ്റ്റ് ചെയ്തു. കാശിനാഥ് മണ്ഡല്‍ ആണ് അറസ്റ്റിലായത്.
മുംബൈയിലെ സ്വകാര്യസ്ഥാപനത്തില്‍ സുരക്ഷാ ജീവനക്കാരനാണ് ഇയാള്‍.

ദേശീയ സുരക്ഷാ സേനയുടെ (എന്‍എസ്ജി) കണ്‍ട്രോള്‍ റൂമില്‍ വിളിച്ചാണ് ഇയാള്‍ ഭീഷണിമുഴക്കിയത്.
പേരു വെളിപ്പെടുത്താതെ ഡല്‍ഹിയിലെ കണ്‍ട്രോള്‍ റൂമിലേക്ക് വിളിച്ച ഇയാളുടെ നമ്പര്‍ എന്‍എസ്ജി അന്വേഷിച്ച് കണ്ടെത്തുകയും മുംബൈ പോലീസിനെ വിവരമറിയിക്കുകയും ചെയ്യുകയായിരുന്നു.

തുടര്‍ന്ന് മുംബൈ സെന്‍ട്രല്‍ റെയില്‍വെ സ്‌റ്റേഷനില്‍ നിന്ന് ജൂലായ് 27 നാണ് ഇയാളെ അറസ്റ്റ് ചെയ്തത്. ഇയാളുടെ സുഹൃത്ത് നക്‌സല്‍ ആക്രമണത്തില്‍ കൊല്ലപ്പെട്ടിരുന്നു. ഇതിനെ കുറിച്ച് പ്രധാനമന്ത്രിയോട് നേരിട്ട് സംസാരിക്കാനുള്ള അവസരത്തിനു വേണ്ടിയാണ് ഇങ്ങനെ ചെയ്തതെന്നാണ് പോലീസിനോട് പറഞ്ഞ്. കൂടുതല്‍ ചോദ്യം ചെയ്യലിനായി ഇയാളെ തിങ്കളാഴ്ച വരെ റിമാന്‍ഡ് ചെയ്തു.