പോലീസ് ജീപ്പിൽ നിന്ന് വലിച്ചിറക്കി യുവാവിനെ ആൾക്കൂട്ടം തല്ലിക്കൊന്നു

ലക്നോ: രാജ്യത്തെ നടുക്കി ഉത്തർപ്രദേശിൽ വീണ്ടും ആൾക്കൂട്ട കൊലപാതകം. ഉത്തര്‍പ്രദേശിലെ ഷാംലിയിലാണ് പോലീസ് ജീപ്പിൽ നിന്ന് വലിച്ചിറക്കി യുവാവിനെ മർദ്ദിച്ച് കൊന്നത്. തിങ്കളാഴ്ചയാണ് കൊലപാതകം നടന്നത്. ഇതിൻെറ വീഡിയോ സോഷ്യൽ മീഡിയയിൽ വൈറലായതോടെ പോലീസിനെതിരെ രൂക്ഷവിമർശനം ഉയർന്നിരിക്കുകയാണ്.

രാജേന്ദ്ര എന്നയാളെയാണ് ആൾക്കൂട്ടം ആക്രമിച്ചത്. മദ്യപിച്ച് ബഹളമുണ്ടാക്കി എന്ന പരാതിയിലാണ് പോലീസ് ഇയാളെ പിടികൂടിയിരുന്നത്. പോലീസ് വാഹനത്തിൽ കയറ്റിയപ്പോഴേക്കും ഇയാളെ ആൾക്കൂട്ടം ആക്രമിച്ചു. പോലീസ് നോക്കി നിൽക്കെ വാഹനത്തിൽ നിന്ന് പുറത്തിട്ട് മർദ്ദിക്കുകയായിരുന്നു. യുവാവിനെ രക്ഷിക്കാൻ വേണ്ടിയുള്ള ഒരു ശ്രമവും പോലീസിൻെറ ഭാഗത്ത് നിന്നുണ്ടായില്ല.

മർദ്ദനത്തെ തുടർന്ന് അബോധാവസ്ഥയിലായ യുവാവ് പിന്നീട് മരിക്കുകയായിരുന്നു. സംഭവ സമയത്ത് ഡ്യൂട്ടിയിലുണ്ടായിരുന്ന പോലീസുകാർക്കെതിരെ നടപടിക്ക് ഒരുങ്ങുകയാണ് പോലീസ് വകുപ്പ്.