സ്വത്ത് തർക്കത്തെതുടർന്ന് വളർത്തുനായയെ ചവിട്ടിക്കൊന്നു; യുവാവിനെതിരെ കേസ്

ഹൈദരാബാദ്: സഹോദരിയുമായുള്ള സ്വത്ത് തർക്കത്തെതുടർന്ന് വളർത്തുനായയെ ചവിട്ടിക്കൊന്ന യുവാവിനെതിരെ കേസെടുത്തു. ഹൈദരാബാദിൽ വെള്ളിയാഴ്ചയാണ് സംഭവം. സംഭവത്തെ തുടർന്ന് നാഗ രാജ് എന്ന യുവാവിനെതിരെയാണ് കേസ് എടുത്തതെന്ന് ഹൈദരാബാദ് പോലീസ് അറിയിച്ചു. സഹോദരി രമാ ദേവിയുമായുള്ള തർക്കത്തെ തുടർന്നാണ് ഇയാൾ വളർത്തുനായയെ ചവിട്ടിക്കൊന്നത്.

ഇരുവരും ഒരേ വീട്ടിലാണ് കഴിയുന്നത്. കഴിഞ്ഞ ഒരാഴ്ചയായി സ്വത്തിന്‍റെ പേരിൽ ഇരുവരും വാക്ക് തർക്കത്തിലേർപ്പെട്ടിരിക്കുകയായിരുന്നെന്ന് റിപ്പോർട്ടുകൾ പറയുന്നു. വളർത്തുനായയെ സഹോദരൻ ചവിട്ടിക്കൊന്നതായി കാട്ടി രമാ ദേവിയാണ് പോലീസിൽ പരാതി നൽകിയത്.

'എന്‍റെ സഹോദരന്‍റെ ഭാര്യ പട്ടിയുടെ കഴുത്തിൽ പിടിച്ച് നിർത്തുകയായിരുന്നു. സഹോദരൻ പട്ടിയുടെ തലയിൽ ചവിട്ടുകയും ചെയ്തു. എന്നെയും അമ്മയെയും കൊല്ലുമെന്നും അവൻ ഭീഷണിപ്പെടുത്തി' രമാ ദേവിയുടെ പരാതിയിൽ പറയുന്നു. മറ്റൊരു വളർത്തുനായയെയും സഹോദരൻ ലക്ഷ്യമിട്ടിരുന്നെന്നും അവർ പറഞ്ഞു.

നായയുടെ മൃതദേഹം പോസ്റ്റ്‌മോർട്ടത്തിനു അയച്ചു. മൃഗങ്ങൾക്കെതിരായ ക്രൂരത തടയൽ നിയമപ്രകാരം നാഗ രാജിനെതിരെ കേസെടുത്തിട്ടുണ്ടെന്ന് പോലീസ് പറഞ്ഞു. ഇപ്പോൾ നാഗരാജിനെതിരെ മാത്രമാണ് കേസെന്നും ഭാര്യയുടെ പങ്കിനെക്കുറിച്ച് അന്വേഷിച്ച ശേഷമാകും അവർക്കെതിരെ നടപടിയെടുക്കുകയെന്നും പോലീസ് പറഞ്ഞു.