ആത്മഹത്യശ്രമം ഫേസ്‍ബുക്ക് ലൈവ്; യുവാവിനെ രക്ഷിച്ചു

ന്യൂഡല്‍ഹി: ആത്മഹത്യ, തത്സമയം ഫേസ്‍ബുക്കില്‍ പോസ്റ്റ് ചെയ്‍ത യുവാവിനെ സമയോചിതമായ ഇടപെടലിലൂടെ രക്ഷിച്ചു. ആത്മഹത്യാശ്രമം ഫേസ്‍ബുക്ക് ലൈവില്‍കണ്ട സുഹൃത്ത് യുവാവിന്‍റെ സഹോദരനെ വിവരമറിയിക്കുകയും അയല്‍വാസിയുടെ സഹായത്തോടെ യുവാവിന്‍റെ ജീവന്‍ രക്ഷിക്കുകയുമായിരുന്നുവെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്‍തു.

തെക്ക് കിഴക്കന്‍ ഡല്‍ഹിയിലെ ആശ്രാമത്തിന് അടുത്തുള്ളയാളാണ് ആത്മഹത്യ ഫേസ്‍ബുക്കില്‍ ലൈവായി സംപ്രഷേണം ചെയ്യാന്‍ തുനിഞ്ഞത്. 26 വയസുകാരനായ ഇയാളുടെ പേര് പോലീസ് വെളിപ്പെടുത്തിയിട്ടില്ല.

ആശുപത്രിയില്‍ എത്തിച്ച യുവാവ് അപകടനില തരണം ചെയ്‍തു.

ആത്മഹത്യക്ക് ഒരുങ്ങുമ്പോള്‍ ഇയാള്‍ വീട്ടില്‍ ഒറ്റയ്ക്കായിരുന്നു. ജോലിസ്ഥലത്തെ സമ്മര്‍ദ്ദവും അവസരങ്ങളുടെ കുറവുമാണ് ആത്മഹത്യയിലെത്തിച്ചതെന്നാണ് ഇയാള്‍ എഫ്‍ബി ലൈവിലൂടെ പറഞ്ഞത്. രാത്രി 1.30ന് ആയിരുന്നു ഫേസ്‍ബുക്ക് ലൈവ്.

ഇയാളുടെ സുഹൃത്തുക്കളില്‍ ഒരാള്‍ രാത്രി ജോലിക്ക് ശേഷം തിരികെയെത്തിയപ്പോള്‍ ലൈവ് കണ്ടു. ഉടന്‍ യുവാവിന്‍റെ സഹോദരനെ വിവരമറിയിച്ചു. സഹോദരന്‍ ഉടന്‍ അയല്‍വാസിയെ ഫോണില്‍ വിളിച്ചു. വീട്ടിലേക്ക് ഉടന്‍ പോകുകയും ചെയ്‍തു.

ഫാനില്‍ കുരുക്ക് മുറുക്കി മരിക്കാന്‍ തയാറെടുക്കുകയായിരുന്നു യുവാവ്. ഈ സമയത്ത് അയല്‍വാസിക്കൊപ്പം ഇയാളുടെ സഹോദരനും മുറിയിലേക്ക് ഇടിച്ചുകയറി. ഇതിനിടയില്‍ നിരവധി ഫോണ്‍ കോളുകള്‍ യുവാവിന് വന്നിരുന്നു. അതൊന്നും അറ്റന്‍ഡ് ചെയ്‍തിരുന്നില്ല.