ഭാര്യ ഉണ്ടാക്കുന്ന ഭക്ഷണത്തിന് രുചിയില്ല; വിവാഹ മോചനം തേടി ഭര്‍ത്താവ് കോടതിയില്‍

മുംബൈ: പുലര്‍ച്ചെ എഴുന്നേല്‍ക്കാത്ത ഭാര്യയില്‍ നിന്ന് വിവാഹമോചനം അനുവദിക്കണമെന്നാവശ്യപ്പെട്ട് മുംബൈ സ്വദേശിയായ യുവാവ് കോടതിയില്‍ ഹര്‍ജി നല്‍കി. ഭാര്യ പുലര്‍ച്ചെ എഴുന്നേല്‍ക്കുന്നില്ല, സ്വാദിഷ്ഠമായ ആഹാരങ്ങള്‍ പാകം ചെയ്ത് നല്കുന്നില്ല, ജോലി കഴിഞ്ഞ് വന്നാലുടന്‍ കിടന്നുറങ്ങാറുണ്ട് തുടങ്ങിയ കാരണങ്ങള്‍ ചൂണ്ടിക്കാട്ടിയാണ് യുവാവ് വിവാഹോമോചനം അനുവദിക്കണമെന്നാവശ്യപ്പെട്ട് ഹര്‍ജി നല്കിയത്.

ഭര്‍ത്താവ് ഹര്‍ജിയില്‍ പറഞ്ഞിരിക്കുന്ന കാരണങ്ങള്‍ ബാലിശമാണെന്നും അവ വിവാഹബന്ധം വേര്‍പ്പെടുത്താന്‍ തക്കകാരണമല്ലെന്നും കോടതി വിലയിരുത്തി. വാദങ്ങള്‍ക്ക് തെളിവായി നല്കിയത് അയാളുടെ പിതാവിന്റെ സത്യവാങ്മൂലമായിരുന്നു. എന്നാല്‍, ആരോപണങ്ങള്‍ വാസ്തവവിരുദ്ധമാണെന്ന് തെളിഞ്ഞതിനെത്തുടര്‍ന്ന് കോടതി ഹര്‍ജി തള്ളുകയായിരുന്നു

ഹര്‍ജി കുടുംബക്കോടതി തള്ളിയതിനെത്തുടര്‍ന്നാണ് യുവാവ് പരാതിയുമായി ഹൈക്കോടതിയെ സമീപിച്ചത്. യുവാവ് ഉന്നയിച്ച ആരോപണങ്ങളെല്ലാം ഭാര്യ നിഷേധിച്ചു. ജോലിഭാരവും വീട്ടിലെ ഉത്തരവാദിത്തവും ഒരുപോലെ നിര്‍വ്വഹിക്കുന്ന ഭാര്യയുടെയൊപ്പമാണ് ന്യായവും നീതിയുമെന്ന് കോടതി വ്യക്തമാക്കി.