നവി മുംബൈ: പ്ലാറ്റ്ഫോം ടിക്കറ്റെടുക്കാത്തത് ചോദ്യം ചെയ്ത വനിതാ ടിടിഇയെ യാത്രക്കാരൻ തള്ളിയിട്ടു. മുംബൈയിൽ പുതുതായി നിർമ്മിച്ച ഭാമൻദോൻഗ്രി റെയിൽവേസ്റ്റേഷനിലാണ് സംഭവം. നാൽപ്പതുകാരനായ യാത്രക്കാരനാണ് വനിതാ ടിടിഇയോട് അപമര്യാദയായി പെരുമാറിയത് പ്ലാറ്റ്ഫോമിലേക്ക് തള്ളിയിട്ടതും.
സെപ്റ്റംബർ 29 ന് നടന്ന സംഭവത്തിൽ രണ്ടാഴ്ചയ്ക്ക് ശേഷമാണ് 29കാരിയായ ടിടിഇ പരാതി നൽകുന്നത്. പാൻവേൽ റെയിൽവേ പൊലീസിലാണ് ടിടിഇ പരാതി നൽകിയത്. ടിക്കറ്റ് എടുക്കാത്തത് ചോദ്യം ചെയ്തപ്പോൾ താൻ രാഷ്ട്രീയക്കാരനാണെന്ന് പറഞ്ഞായിരുന്നു ഇയാളുടെ അതിക്രമമെന്ന് സീനിയർ റെയിൽവേ പൊലീസ് ഇൻസ്പെക്ടർ വൃശാലി കവൻപുരെ പറഞ്ഞു.
'ടിക്കറ്റ് ഇല്ലാത്തതിന് പിഴയൊടുക്കാൻ ആവശ്യപ്പെട്ടപ്പോൾ ടിടിഇയുടെ നെഞ്ചിൽ പിടിച്ച് തള്ളുകയായിരുന്നു. ഒരു ട്രെയിൻ വരികയായിരുന്ന പ്ലാറ്റ്ഫോമിലേക്കാണ് അവർ വീണത്.' പൊലീസ് ഉദ്യോഗസ്ഥൻ പറഞ്ഞു. സ്ത്രീയെ സമ്മതമില്ലാതെ സ്പർശിച്ചതിനും അപമാനിച്ചതിനും കേസ് രജിസ്റ്റർ ചെയ്തിട്ടുണ്ടെന്നും പൊലീസ് വ്യക്തമാക്കി.
ടിടിഇയുടെ പരാതി റെയിൽവേ പൊലീസ് എൻആർഐ കോസ്റ്റൽ പൊലീസിന് കൈമാറിയെന്നും ഉദ്യോഗസ്ഥർ വ്യക്തമാക്കി.