മോദിയുടെ മന്‍ കി ബാത്ത് 50-ാം എപ്പിസോഡ് നാളെ

പ്രധാനമന്ത്രി നരേന്ദ്ര മോദിയുടെ പ്രതിമാസ റേഡിയോ പ്രഭാഷണം, മന്‍ കി ബാത്ത് അമ്പതാമത്തെ എപ്പിസോഡില്‍. നവംബര്‍ 25ന് രാവിലെ 11 മണിക്കാണ് അമ്പതാമത്തെ എപ്പിസോഡ് പ്രക്ഷേപണം ചെയ്യുന്നത്. ഓള്‍ ഇന്ത്യ റേഡിയോ ചാനലുകളിലും പ്രധാനമന്ത്രിയുടെ ഓഫീസിന്‍റെ യൂട്യൂബ് ചാനലിലും വാര്‍ത്തപ്രേക്ഷപണ മന്ത്രാലയം ചാനലുകളിലും പ്രധാനമന്ത്രിയെ കേള്‍ക്കാം.

ഹിന്ദിയില്‍ ആദ്യം നടക്കുന്ന സംപ്രേഷണത്തിന് ശേഷം പ്രാദേശിക ഭാഷകളില്‍ രാത്രി എട്ടിന് പുന:സംപ്രേഷണം ഉണ്ടാകും. 2014 ഒക്ടോബര്‍ മൂന്നിന് ആയിരുന്നു ആദ്യത്തെ മന്‍ കി ബാത്ത് നടന്നത്.

രാഷ്ട്രീയത്തിലുപരി പൊതുവെ പുരോഗമനപരമായ വിഷയങ്ങളാണ് മോദി മന്‍ കി ബാത്തിലൂടെ സംസാരിക്കാറ്. പെണ്‍കുട്ടികളുടെ വിദ്യാഭ്യാസം, പരീക്ഷ സമ്മര്‍ദ്ദം, മലിനീകരണം തടയല്‍, മയക്കുമരുന്ന് ഉപയോഗം കുറയ്ക്കല്‍ തുടങ്ങിയ വിഷയങ്ങളില്‍ നരേന്ദ്ര മോദി പലപ്പോഴായി മന്‍ കി ബാത്തിലൂടെ അഭിപ്രായങ്ങള്‍ പറഞ്ഞിട്ടുണ്ട്.

2015 ജനുവരിയിലെ എപ്പിസോഡില്‍ അമേരിക്കന്‍ പ്രസിഡന്‍റ് ബരാക് ഒബാമയും മോദിക്കൊപ്പം പങ്കെടുത്തിരുന്നു. ഏതെങ്കിലും ഒരു ഇന്ത്യന്‍ പ്രധാനമന്ത്രിയും അമേരിക്കന്‍ പ്രസിഡന്‍റും ഒരുമിച്ച് നടത്തുന്ന ആദ്യത്തെ റേഡിയോ പ്രഭാഷണം എന്ന രീതിയില്‍ ഇത് ശ്രദ്ധിക്കപ്പെട്ടു.

നൂറ്റാണ്ടിലെ ഏറ്റവും വലിയ പ്രളയം കേരളത്തില്‍ ഉണ്ടായപ്പോള്‍ ഇന്ത്യ കേരളത്തോടൊപ്പം നില്‍ക്കുന്നു എന്ന പ്രത്യേക സന്ദേശം മന്‍ കി ബാത്തിലൂടെ മോദി അറിയിച്ചിരുന്നു. കേരളത്തില്‍ നിന്ന് ഒന്നിലധികം തവണ വിവിധ മേഖലകളില്‍ നിന്നുള്ള വ്യക്തികള്‍ മന്‍ കി ബാത്തില്‍ പരാമര്‍ശിക്കപ്പെട്ടിട്ടുമുണ്ട്.