പദ്മാവത്: അഹമ്മദാബാദിൽ വ്യാപക പ്രതിഷേധം

അഹമ്മദാബാദ്: സഞ്ജയ് ലീലാ ബൻസാലിയുടെ വിവാദ ചലച്ചിത്രം പദ്മാവത് നാളെ റിലീസിനൊരുങ്ങുമ്പോൾ ചിത്രത്തിനെതിരെ വ്യാപക പ്രതിഷേധവും അക്രമവും. അഹമ്മദാബാദിൽ പ്രതിഷേധക്കാര്‍ നിരവധി വാഹനങ്ങള്‍ അഗ്നിക്കിരയാക്കി. കടകള്‍ക്കു നേരെയും മാളുകള്‍ക്കു നേരെയും കല്ലേറുണ്ടായി. ചൊവ്വാഴ്ച വൈകുന്നേരത്തോടെയാണ് സംഘര്‍ഷം രൂക്ഷമായത്.

അഹമ്മദാബാദിൽ ഹിമാലയ മാളിനു മുന്നിൽ നിന്ന് പ്രതിഷേധക്കാരെ പിരിച്ചുവിടാൻ പോലീസ് ആകാശത്തേയ്ക്ക് രണ്ടു റൗണ്ട് വെടിവെച്ചു. 10 പേരെ അറസ്റ്റ് ചെയ്തിട്ടുമുണ്ട്. ചിത്രത്തിന്‍റെ റിലീസ് തടയണമെന്ന് ആവശ്യപ്പെട്ട് കര്‍ണിസേനയുടെ നേതൃത്വത്തിലാണ് പ്രതിഷേധം. എന്നാൽ അക്രമത്തിൽ തങ്ങള്‍ക്ക് പങ്കില്ലെന്നാണ് കര്‍ണിസേനാ നേതാവ് ലോകേന്ദ്ര സിങിന്‍റെ വാദം. അതേസമയം, അക്രമം നടത്തുന്നവര്‍ക്കെതിരെ കര്‍ശനനടപടിയെടുക്കാൻ നിര്‍ദേശം നല്‍കിയിട്ടുണ്ടെന്ന് ഗുജറാത്ത് ഉപമുഖ്യമന്ത്രി നിതിൻ പട്ടേൽ അറിയിച്ചു.

തീയേറ്ററുകള്‍ പദ്മാവത് പ്രദര്‍ശിപ്പിക്കാൻ തയ്യാറാകില്ലെന്ന് ഉറപ്പുണ്ടെന്നും ഇനി ആരെങ്കിലും പ്രദര്‍ശിപ്പിച്ചാൽ അവര്‍ പരിണിതഫലം അനുഭവിക്കുമെന്നും മറ്റൊരു കര്‍ണിസേന നേതാവ് പറഞ്ഞു.

അതേ സമയം പദ്മാവത് പ്രദര്‍ശിപ്പിക്കാന്‍ തയ്യാറാകുന്ന തീയേറ്ററുകള്‍ക്ക് സര്‍ക്കാര്‍ പോലീസ് സംരക്ഷണം നല്‍കുമെന്ന് പറയുന്നുണ്ടെങ്കിലും അക്രമികള്‍ക്കെതിരെ പോലീസ് നോക്കി നില്‍ക്കുകയാണെന്ന ആക്ഷേപവും ഉയരുന്നുണ്ട്.