മെഡിക്കൽ സ്‌പോട്ട് അഡ്‌മിഷന് മാറ്റമില്ല: എൻട്രൻസ് കമ്മീഷണർ

തിരുവനന്തപുരം: മെഡിക്കൽ കോളജ് സ്‌പോട്ട് അഡ്‌മിഷൻ മുൻ നിശ്ചയിച്ചത് പോലെ തന്നെ നടക്കുമെന്ന് എൻട്രൻസ് കമ്മീഷണർ വ്യക്തമാക്കി. സ്‌പോട്ട് അഡ്മിഷൻ നാളെയും മറ്റന്നാളും നടക്കും. തിങ്കളാഴ്‌ച്ചക്കകം പ്രവേശന നടപടികൾ തീർക്കണമെന്നാണ് കേരളത്തിന് മെഡിക്കൽ കൗൺസിൽ ഓഫ് ഇന്ത്യ നൽകിയിരിക്കുന്ന നിർദേശം.

ഡി.എം വയനാട്, തൊടുപുഴ അൽ അസർ, പാലക്കാട് പി.കെ.ദാസ്,തിരുവനന്തപുരം എസ്.ആർ എന്നീ കോളജുകളുടെ പ്രവേശനം സുപ്രീം കോടതി തടഞ്ഞിരുന്നു. തുടർന്ന് ഈ കോളജുകളിലേക്കുള്ള പ്രവേശനം അനിശ്ചിതത്വത്തിലായിരുന്നു. അതിനിടെ, ഈ കോളജുകളിലെ പ്രവേശനത്തിന് എതിരായി സമർപ്പിച്ച ഹർജി പരിഗണിക്കുന്നത് സുപ്രീം കോടതി അടുത്ത ബുധനാഴ്ചയിലേക്ക് മാറ്റി.

എല്ലാ രേഖകളും ബുധാനാഴ്ചക്കകം സമർപ്പിക്കണമെന്നാണ് സുപ്രീം കോടതി നിർദേശം. കേസ് വേഗം തീർപ്പാക്കണമെന്ന സംസ്ഥാന സർക്കാർ ആവശ്യം അംഗീകരിച്ചില്ല. ഈ മാസം പത്താം തീയതിക്കകം പ്രവേശനം പൂർത്തിയാക്കണമെന്നും അതിന് മുൻപ് കേസിൽ തീരുമാനമുണ്ടാകണമെന്നും സംസ്ഥാന സർക്കാർ ആവശ്യപ്പെട്ടിരുന്നു.