നിങ്ങളുടെ കൈകളും കാലും ഒടിയും, ശ്മശാനത്തിലേക്ക് അയക്കും; ഭീഷണിയുമായി പശ്ചിമബംഗാൾ BJP അധ്യക്ഷൻ

കൊല്‍ക്കത്ത: പശ്ചിമബംഗാളിൽ തൃണമുൽ കോൺഗ്രസ് പ്രവർത്തകർക്ക് നേരെ വധ ഭീഷണിയുമായി പശ്ചിമബംഗാൾ ബിജെപി അധ്യക്ഷൻ ദിലീപ് ഘോഷ്. അടുത്ത ആറുമാസത്തിനുള്ളിൽ തൃണമുൽ പ്രവർത്തകർ നന്നായില്ലെങ്കിൽ അവരുടെ കാലുകളും വാരിയെല്ലും തകരുമെന്ന് അദ്ദേഹം പറഞ്ഞു. തൃണമുലുകാർ തെറ്റ് തുടരുകയാണെങ്കിൽ ശ്മശാനത്തിലേക്ക് പോകേണ്ടിവരുമെന്നും അദ്ദേഹം ഭീഷണിപ്പെടുത്തി.

ഈസ്റ്റ് മിഡ്നാപുരിലെ ഹാല്‍ദിയയില്‍ ഒരു റാലിയില്‍ സംസാരിക്കവെയാണ് ദിലീപ് ഘോഷ് ഭീഷണിയുമായി രംഗത്തെത്തിയെതെന്ന് ദേശീയ മാധ്യമമായ ഇന്ത്യ ടുഡേയാണ് റിപ്പോർട്ട് ചെയ്തത്. സംസ്ഥാനത്ത് സ്വതന്ത്രവും നീതിയുക്തവുമായ തെരഞ്ഞെടുപ്പ് നടക്കുമെന്ന് കേന്ദ്രം ഉറപ്പ് വരുത്തുമെന്നും ബിജെപി സംസ്ഥാന അധ്യക്ഷൻ പറഞ്ഞു.

Also Read : അച്ചടക്കം പാലിക്കണം; വോട്ടെണ്ണലിന് മുന്നോടിയായി പ്രവ‍ര്‍ത്തകര്‍ക്ക് ആ‍ര്‍ജെഡിയുടെ മുന്നറിയിപ്പ്

"മമത ദീദിയുടെആളുകൾ പ്രശ്‌നങ്ങള്‍ സൃഷ്ടിക്കുന്ന ശീലം ആറുമാസത്തിനുള്ളിൽ തിരുത്തിയില്ലെങ്കില്‍ നിങ്ങളുടെ കൈകളും കാലും വാരിയെല്ലുകളും ഒടിയും. ശിരസ്സ്‌ തകരും. വീട്ടിലേക്ക് പോകുന്നതിന് മുൻപ് നിങ്ങള്‍ക്ക് ആശുപത്രിയിലേക്ക് പോകേണ്ടിവരും. അവർ പ്രശ്‌നങ്ങള്‍ കൂട്ടുകയാണെങ്കിൽ അവരെ ശ്മശാനത്തിലേക്ക് അയക്കും" ദിലീപ് ഘോഷ് പറഞ്ഞതായി വാർത്താ ഏജൻസിയായ എഎൻഐ റിപ്പോർട്ട് ചെയ്യുന്നു.


Also Read: ബിഹാർ ഫലപ്രഖ്യാപനത്തിന് പിന്നാലെ ബിജെപി കർണാടക മുഖ്യമന്ത്രിയെ മാറ്റുമെന്ന് സിദ്ധരാമയ്യ

കേന്ദ്ര ആഭ്യന്തര മന്ത്രി അമിത് ഷാ സംസ്ഥാനം സന്ദർശിച്ച് രണ്ട് ദിവസത്തിന് ശേഷമാണ് സംസ്ഥാന ബിജെപി അധ്യക്ഷന്‍റെ വാക്കുകൾ. 200 സീറ്റുകൾ സംസ്ഥാനത്ത് ബിജെപി ലക്ഷ്യമിടുന്നെന്ന വാർത്തകൾക്ക് പിന്നാലെയാണ് ഇത്. നിയമസഭാ തെരഞ്ഞെടുപ്പ് ദീദിയുടെ പോലീസിന് കീഴിലല്ല, മറിച്ച് ദാദയുടെ പോലീസാകും നടത്തുകയെന്നും ഘോഷ് പറഞ്ഞു.

ബിജെപി അധ്യക്ഷന്‍റെ പ്രസ്താവനയ്ക്കെതിരെ തൃണമുൽ നേതാക്കളും കോൺഗ്രസ് നേതാക്കളും രംഗത്തെത്തിയിട്ടുണ്ട്.