ബിജെപിയുടെ ഉറ്റവരും ഒപ്പം കൂടുന്നു; തെന്നിന്ത്യ ലക്ഷ്യമാക്കി മമതയുടെ കരുനീക്കം; ഗോവ പിടിക്കാൻ തൃണമൂൽ

നിലവിൽ ഒറ്റ എംഎൽഎ മാത്രമാണുള്ളതെങ്കിലും ഗോവയുടെ രാഷ്ട്രീയചരിത്രത്തിൽ എംജിപിയ്ക്ക് ഏറെ പ്രാധാന്യമുണ്ട്. 1961ൽ പോര്‍ച്ചുഗീസ് ഭരണം അവസാനിച്ചപ്പോള്‍ ആദ്യം നടന്ന തെരഞ്ഞെടുപ്പിൽ മത്സരിച്ചു വിജയിച്ചത് മഹാരാഷ്ട്രവാദി ഗോമന്തക് പാര്‍ട്ടിയായിരുന്നു. പിന്നീട് ശക്തി ക്ഷയിച്ചെങ്കിലും 2007ൽ കോൺഗ്രസിനോടൊപ്പം സഖ്യത്തിലേര്‍പ്പെട്ടു മത്സരിച്ച എംജിപിയ്ക്ക് 9 ശതമാനം വരെയായി വോട്ടുവിഹിതം ഉയര്‍ത്താൻ സാധിച്ചിരുന്നു.ബ്രാഹ്മണരൊഴികെയുള്ള ഹിന്ദുവോട്ടുകളാണ് എംജിപിയുടെ അടിത്തറ. ബിജെപിയുടെ കടന്നുവരവോടെയാണ് എംജിപി തളര്‍ന്നു തുടങ്ങിയത്. എന്നാൽ 2017ൽ മൂന്ന് എംഎൽഎമാരുമായി ബിജെപിയ്ക്കൊപ്പം കൂടിയ എംജിപിയ്ക്ക് രണ്ട് മന്ത്രിസ്ഥാനങ്ങളും കിട്ടി. എന്നാൽ രണ്ട് എംഎൽഎമാര്‍ രാജിവെച്ച്ബിജെപിയിൽ ചേര്‍ന്നതോടെ പാര്‍ട്ടിയുടെ അംഗബലം ഒന്നായി ചുരുങ്ങുകയായിരുന്നു.

എംജിപിയ്ക്കു പുറമെ കോൺഗ്രസ് വിട്ടു അടുത്തിടെ തൃണമൂൽ കോൺഗ്രസിൽ ചേര്‍ന്ന മുതിര്‍ന്ന നേതാവും മുൻ രാജ്യസഭാ എംപിയുമായ ലൂസിഞ്ഞോ ഫലേറോയും മമതയ്ക്കൊപ്പമുണ്ട്. എംജിപി തൃണമൂൽ സഖ്യം പ്രഖ്യാപിക്കുന്ന വേദിയിലും ലൂസിഞ്ഞോയുടെ സാന്നിധ്യം ഉണ്ടായിരുന്നു. 2022 ഫെബ്രുവരിയിലാണ് ഗോവ നിയമസഭാ തെരഞ്ഞെടുപ്പ് നടക്കാനിരിക്കുന്നത്. തെരഞ്ഞെടുപ്പിനു മുന്നോടിയായി മുൻ ബിജെപി സഖ്യകക്ഷികളായ ഗോവ ഫോര്‍വേഡ് പാര്‍ട്ടിയുമായും തൃണമൂൽ നേതാക്കള്‍ ചര്‍ച്ച നടത്തുന്നുണ്ടെന്നാണ് ദേശീയ മാധ്യമങ്ങളുടെ റിപ്പോര്‍ട്ടുകള്‍.

നിലവിലെ സാഹചര്യത്തിൽ ശക്തമായ ത്രികോണമത്സരത്തിനായിരിക്കും ഗോവ നിയമസഭാ തെരഞ്ഞെടുപ്പ് സാക്ഷ്യം വഹിക്കുക. വിജയ് സര്‍ദേശായിയുടെ നേതൃത്വത്തിലുള്ള ഗോവ ഫോര്‍വേഡ് പാര്‍ട്ടിയുമായും തൃണമൂൽ മുൻപ് സഖ്യത്തിനു ശ്രമിച്ചെങ്കിലും സര്‍ദേശായി കോൺഗ്രസുമായി കഴിഞ്ഞയാഴ്ച കൈകോര്‍ത്തതോടെ മമതയുടെ നീക്കം പാളി. ലോക്സഭാ എംപിയും നടിയുമായ മെഹുവ മോയിത്രയ്ക്കാണ് മമത ബാനര്‍ജി ഗോവയുടെ ചുമതല നല്‍കിയിരിക്കുന്നത്. മുൻപ് ബിജെപിയുമായി കൈകോര്‍ത്ത ഗോവ ഫോര്‍വേഡ് പാര്‍ട്ടി വീണ്ടും കോൺഗ്രസിനൊപ്പം കൂടുന്നത് രാഷ്ട്രീയനേട്ടം മാത്രം മുന്നിൽ കണ്ടാണെന്നാണ് മെഹുവ ട്വീറ്റ് ചെയ്തത്.