തൃണമൂലിന് 'ഇരട്ടപ്രഹരം'; മമതയ്‌ക്കൊപ്പം പാർട്ടി സ്ഥാപിച്ച മിഹിർ ഗോസ്വാമി ബിജെപിയിൽ ചേർന്നു, നിലപാട് വ്യക്തമാക്കാതെ സുവേന്ദു അധികാരി

കൊൽക്കത്ത: തൃണമൂൽ കോൺഗ്രസ് നേതാവും കൂച്ച്‌ബിഹാർ എംഎൽഎയുമായ മഹിർ ഗോസ്വാമി ബിജെപിയിൽ ചേർന്നു. ഡൽഹിയിലെ ബിജെപി കേന്ദ്ര ആസ്ഥാനത്ത് നടന്ന ചടങ്ങിൽ ദേശീയ ജനറൽ സെക്രട്ടറി കൈലാഷ് വിജയവർഗിയയുടെ സാന്നിധ്യത്തിലാണ് മിഹിർ ബിജെപി അംഗത്വം സ്വീകരിച്ചത്.

Also Read: തൃണമുൽ കോൺഗ്രസിന് തിരിച്ചടി; പശ്ചിമബംഗാൾ ഗതാഗത മന്ത്രി രാജിവെച്ചു

മുഖ്യമന്ത്രി മമത ബാനർജിക്കൊപ്പം 1998ൽ തൃണമൂൽ കോൺഗ്രസ് രൂപവത്‌കരിച്ച നേതാക്കളിൽ ഒരാളാണ് മിഹിർ ഗോസ്വാമി. കഴിഞ്ഞ ദിവസം പാർട്ടിയുടെ പ്രാഥമിക അംഗത്വം രാജിവെച്ഛ അദ്ദേഹം നേതൃത്വത്തിനെതിരെ രൂക്ഷമായ ആരോപണങ്ങൾ ഉന്നയിച്ചിരുന്നു. അവഗണ ഇനിയും സഹിക്കാനാവില്ലെന്നും അതിനാൽ തൃണമൂലുമായുള്ള ബന്ധം തുടർന്നും മുൻപോട്ട് കൊണ്ട് പോകുക ബുദ്ധിമുട്ടാണെന്നുമാണ് അദ്ദേഹം പറഞ്ഞത്.

കഴിഞ്ഞമാസം ബിജെപി എംപി നിസിത് പ്രമാണിക്കുമായി മിഹിര്‍ കൂടിക്കാഴ്‌ച നടത്തിയിരുന്നു. ഇതിനു പിന്നാലെ മിഹിര്‍ പാര്‍ട്ടി വിടുകയാണെന്ന അഭ്യൂഹം ശക്തമായിരുന്നു.


മഹിർ ഗോസ്വാമി ബിജെപിയിൽ എത്തിയതോടെ തൃണമൂൽ കോൺഗ്രസിന് വൻ തിരിച്ചടിയാണ് ലഭിച്ചത്.
മുതിർന്ന നേതാവും ഗതാഗത മന്ത്രിയുമായ സുവേന്ദു അധികാരി തൃണമുൽ മന്ത്രി സഭയിൽ നിന്ന് ഇന്ന് രാജിവെച്ചിരുന്നു. മമത ബാനർജിക്കാണ് ഇദ്ദേഹം രാജിക്കത്ത് നൽകിയത്. എച്ച്ആർബിസി സ്ഥാനം രാജിവെച്ചതിന് പിന്നാലെയാണ് സുവേന്ദു മന്ത്രിസഭയിൽ നിന്നും രാജിവെച്ചത്.


Also Read: പ്രധാനമന്ത്രി നടപ്പാക്കേണ്ടത് 'ഒരു രാജ്യം, ഒരു പരിഗണന': കേന്ദ്രസർക്കാരിനെതിരെ പ്രിയങ്ക ഗാന്ധി

പാർട്ടിയുമായി ഇടഞ്ഞ് നിൽക്കുന്ന നേതാവാണ് സുവേന്ദു അധികാരി. മുഖ്യമന്ത്രിയെ അഭിസംബോധന ചെയ്ത് സുവേന്ദു തയ്യാറാക്കിയ രാജി കത്തിന്‍റെ പകർപ്പ് ലഭിച്ചതായി സംസ്ഥാന ഗവർണർ ജഗ്ദീപ് ധൻകർ വ്യക്തമാക്കിയിരുന്നു. രാജിക്കത്ത് ലഭിച്ചതായി ട്വിറ്ററിലൂടെയാണ് ഗവർണർ പ്രതികരിച്ചത്. സുവേന്ദു അധികാരി ബിജെപിയിലെത്തുമെന്ന റിപ്പോർട്ടുകളും പുറത്തുവരുന്നുണ്ട്.