അഞ്‍ജുവിന് ബിജെപി അംഗത്വം നൽകിയിട്ടില്ലെന്ന് വി മുരളീധരൻ

ബെംഗലൂരു: ബെംഗലൂരുവിലെ ജയനഗറിൽ നടന്ന ബിജെപി സമ്മേളന വേദിയിൽ ഒളിമ്പ്യൻ അഞ്‍ജു ബോബി ജോർജിന് പാർട്ടി അംഗത്വം നൽകിയിട്ടില്ലെന്ന് കേന്ദ്രമന്ത്രി വി.മുരളീധരൻ. ജയനഗറിൽ നടന്ന ചടങ്ങിൽ അഞ്‍ജു തന്നെ കാണാനാണ് എത്തിയത്. വേദിയിലേക്ക് കടന്നു വരുന്നവരെയെല്ലാം പതാക നൽകിയാണ് സ്വീകരിച്ചത്.

വേദിയിലുള്ള എല്ലാവർക്കും പതാക നൽകി സ്വീകരിച്ചപ്പോൾ അഞ്‍ജുവിന് ലഭിച്ച പതാക പിടിച്ചുള്ള ചിത്രം വൈറലായതാണ് പ്രശ്നമായതെന്നും മുരളീധരൻ കൂട്ടിച്ചേർത്തു. അഞ്‍ജു വേദിയിലേക്ക് വന്നത് തന്നോട് സംസാരിക്കാനുള്ള സൗകര്യത്തിന് വേണ്ടിയായിരുന്നെന്നും മുരളീധരൻ കൂട്ടിച്ചേർത്തു. അഞ്‍ജു ബിജെപി സമ്മേളനവേദിയിൽ എത്തിയത് അക്കാദമിയുടെ കാര്യങ്ങൾ സംസാരിക്കുന്നതിന് വേണ്ടിയായിരുന്നെന്ന് മുരളീധരൻ പറഞ്ഞു.

പാർട്ടിയിൽ ചേർന്നതായുള്ള വാർത്ത തള്ളി അഞ്‍ജുവും രംഗത്തെത്തിയിരുന്നു. "ഞാൻ ബിജെപിയിൽ ചേർന്നിട്ടില്ല. എന്റെ മതവും രാഷ്ട്രീയവും സ്പോർട്‍സ് തന്നെ" - അഞ്ജു ബോബി ജോര്‍ജ് ഏഷ്യാനെറ്റ് ന്യൂസിനോട് പ്രതികരിച്ചു. കര്‍ണാടകയിൽ നിന്നുള്ള ബിഎസ് യെദ്യൂരപ്പ ഉള്‍പ്പെടെയുള്ള നേതാക്കള്‍ക്കും വിദേശകാര്യ സഹമന്ത്രി വി മുരളീധരനുമൊപ്പം അഞ്ജു ബോബി ജോര്‍ജ് ബിജെപി പതാകയേന്തി നിൽക്കുന്ന ചിത്രമാണ് എഎൻഐ വാർത്തക്കൊപ്പം ട്വീറ്റ് ചെയ്തത്.

താൻ ബിജെപി അംഗത്വമെടുത്തിട്ടില്ലെന്നും കുടുംബ സുഹൃത്തായ വി മുരളീധരനെ കാണാൻ അവിടെ എത്തിയതാണെന്നും താരം വ്യക്തമാക്കി.സമ്മേളനസ്ഥലത്ത് എത്തിയപ്പോൾ പാര്‍ട്ടിക്കാര്‍ വേദിയിലേയ്ക്ക് ക്ഷണിക്കുകയായിരുന്നുവെന്നും അവർ പതാക നൽകി സ്വീകരിക്കുകയായിരുന്നെന്നും അഞ്ജു വ്യക്തമാക്കി. താൻ ചെന്ന സ്ഥലത്ത് ബിജെപിയുടെ അംഗത്വ വിതരണ ക്യാംപയിൻ നടക്കുകയായിരുന്നുവെന്ന് അറിയില്ലായിരുന്നുവെന്നും അഞ്‍ജു കൂട്ടിച്ചേർത്തു. അഞ്‍ജു വേദിയിൽ പതാക പിടിച്ച് നേതാക്കൾക്കൊപ്പം നിൽക്കുന്ന ചിത്രമാണ് സാമൂഹ്യമാധ്യമങ്ങളിൽ പ്രചരിച്ചത്.

താൻ ബിജെപിയിൽ ചേര്‍ന്നിട്ടില്ലെന്നും അത്തരം വാര്‍ത്തകള്‍ തെറ്റാണെന്നും താരം വ്യക്തമാക്കി. കര്‍ണാടക ബിജെപി സംസ്ഥാന അധ്യക്ഷനും മുന്‍ മുഖ്യമന്ത്രിയുമായ ബിഎസ് യെദിയൂരപ്പ, കേന്ദ്ര മന്ത്രിയായ വി മുരളീധരന്‍, പാര്‍ട്ടി എംപി തേജസ്വി സൂര്യ എന്നിവരുടെ സാന്നിധ്യത്തില്‍ ബെംഗലൂരുവിലെ ജയനഗറിൽ വെച്ച് അഞ്ജു ബോബി ജോര്‍ജ് ബിജെപി അംഗത്വം നേടിയെന്നായിരുന്നു ബിജെപി സോഷ്യൽ മീഡിയ വഴി നടത്തിയ പ്രചരണം. ബിജെപി കര്‍ണാടക ഫേസ്ബുക്ക് പേജ് വാര്‍ത്ത പങ്കുവെച്ചതിനു പിന്നാലെ വാര്‍ത്താ ഏജൻസിയായ എഎൻഐയും സംഭവം ചിത്രം ഉള്‍പ്പെടെ ട്വീറ്റ് ചെയ്യുകയായിരുന്നു.