പട്നയിൽ ദളിത് വിഭാഗക്കാര്‍ക്കൊപ്പം ഉച്ചഭക്ഷണം കഴിച്ച് കേന്ദ്രമന്ത്രി

പട്‍‍ന: ദളിത്‍‍വിഭാഗങ്ങളെ ഒപ്പം നിര്‍ത്താനുള്ള ബിജെപി തന്ത്രത്തിന്‍റെ ഭാഗമായി കേന്ദ്രമന്ത്രി രവിശങ്കര്‍ പ്രസാദ് ദളിതര്‍ക്കൊപ്പം ഉച്ചഭക്ഷണം കഴിച്ചു. പട്‍‍നയിലെ പഞ്ചനക്ഷത്ര ഹോട്ടലിൽ ശനിയാഴ്ചയായിരുന്നു പരിപാടി. പട്‍‍നയിലെ ദളിത് ഭൂരിപക്ഷപ്രദേശമായ ചീമ കോതിയിൽ മരപ്പാലത്തിനുള്ള തറക്കല്ലിടാനായാണ് കേന്ദ്രമന്ത്രി എത്തിയത്. ഇതിനു ശേഷമായിരുന്നു ഉച്ചഭക്ഷണപരിപാടി.

അംബേദ്കര്‍ ചിത്രത്തിന് മന്ത്രി ഹാരാര്‍പ്പണം നടത്തി. ബിജെപി നേതാവും ബീഹാര്‍ മന്ത്രിയുമായ നന്ദകിഷോര്‍ യാദവും രണ്ട് എംഎൽഎമാരും ഒപ്പമുണ്ടായിരുന്നു.

ദളിത് ഭൂരിപക്ഷ പ്രദേശങ്ങള്‍ സന്ദര്‍ശിച്ച് അവരുടെ പ്രശ്നങ്ങള്‍ പഠിക്കണമെന്നും സര്‍ക്കാരിന്‍റെ ദളിത് ക്ഷേമപദ്ധതികളെക്കുറിച്ച് ബോധവത്കരണം നടത്തണമെന്നും ബിജെപി നേതൃത്വത്തിന്‍റെ നിര്‍ദേശമുണ്ട്. ദളിതര്‍ക്കൊപ്പം ഭക്ഷണം കഴിക്കണമെന്നും നിര്‍ദേശമുണ്ട്. ഇതിന്‍റെ ഭാഗമായാണ് രവിശങ്കര്‍ പ്രസാദ് ദളിതര്‍ക്കൊപ്പം ഉച്ചഭക്ഷണം കഴിച്ചത്.