വോട്ടര്‍ ഐഡി ആധാറുമായി ബന്ധിപ്പിക്കേണ്ട: കേന്ദ്രമന്ത്രി

ബെംഗലുരു: വോട്ടര്‍ ഐഡി കാര്‍ഡ് ആധാറുമായി ബന്ധിപ്പിക്കുന്നതിനോട് വ്യക്തിപരമായി തനിക്ക് യോജിപ്പില്ലെന്ന് കേന്ദ്ര വിവരസാങ്കേതിക വകുപ്പ് മന്ത്രി രവിശങ്കര്‍ പ്രസാദ്. ഐടി മന്ത്രി എന്ന നിലയ്ക്കല്ല തന്‍റെ പ്രസ്താവനയെന്നും മന്ത്രി കൂട്ടിച്ചേര്‍ത്തു. തിരിച്ചറിയൽ കാര്‍ഡ് തിരഞ്ഞെടുപ്പ് കമ്മീഷന്‍റെ വെബ് പോര്‍ട്ടലുമായി ബന്ധിപ്പിച്ചിട്ടുണ്ടെന്നും ആധാറുമായി ഇതിനു ബന്ധമില്ലെന്നും മന്ത്രി പറഞ്ഞു.

ജനങ്ങളെ രഹസ്യമായി നിരീക്ഷിക്കുന്നവരാണെന്ന ആരോപണം നേരിടാൻ സര്‍ക്കാര്‍ ഉദ്ദേശിക്കുന്നില്ല. അങ്ങനെ ചെയ്യുകയാണെങ്കിൽ ജനങ്ങളുടെ ഭക്ഷണത്തിലും അവര്‍ കാണുന്ന സിനിമകളിലും പ്രധാനമന്ത്രി ഇടപെടുകയാണെന്ന് ശത്രുക്കള്‍ പറയുമെന്നും രവിശങ്കര്‍ പ്രസാദ് പറഞ്ഞു.

നരേന്ദ്ര മോദിയുടെയും മൻമോഹൻ സിങിന്‍റെയും ആധാര്‍ പദ്ധതികള്‍ തമ്മിൽ വ്യത്യാസമുണ്ടെന്നും മോദിയുടെ ആധാര്‍ നിയമപരിരക്ഷയുള്ളതാണെന്നും രവിശങ്കര്‍ പ്രസാദ് ആവര്‍ത്തിച്ചു. ഇത് സ്വകാര്യതയും സുരക്ഷിതത്വവും ഉറപ്പാക്കും. ബാങ്ക് അക്കൗണ്ടുകളെ ആധാറുമായി ബന്ധിപ്പിക്കുന്നതിനെ ശക്തമായി ന്യായീകരിച്ച മന്ത്രി പദ്ധതി ക്ഷേമപദ്ധതികള്‍ സുതാര്യമായി നടപ്പാക്കാൻ ഇത് ഉപകരിക്കുമെന്നു വാദിച്ചു.

ജൻധൻ പദ്ധതിയുടെ ഭാഗമായി ഇതിനോടകം 80 കോടിയോളം മൊബൈൽ നമ്പറുകള്‍ ബാങ്ക് അക്കൗണ്ടുകളുമായി ബന്ധിപ്പിച്ചിട്ടുണ്ടെന്ന് അദ്ദേഹം അറിയിച്ചു.