ബെംഗളൂരുവിൽ കാണാതായ മലയാളി ടാക്സി ഡ്രൈവറുടെ മൃതദേഹം കണ്ടെത്തി

ഹൊസൂർ (ബെംഗളൂരു): കർണാടകയിൽവച്ച് ദുരൂഹസാഹചര്യത്തില്‍ കാണാതായ തൃശൂര്‍ സ്വദേശിയായ മലയാളി യുവാവിനെ മരിച്ച നിലയിൽ കണ്ടെത്തി. ഒല ടാക്സി ഡ്രൈവറായിരുന്ന റിന്‍സനെയാണ് മരിച്ച നിലയില്‍ കണ്ടെത്തിയത്.

ഹൊസൂരിനു സമീപം ഭദ്രാപ്പള്ളിയിലെ ഒാടയില്‍നിന്നാണ് റിൻസന്റെ മൃതദേഹം ലഭിച്ചത്. കാണാതായി എട്ടു ദിവസങ്ങൾക്ക് ശേഷമാണ് മൃതദേഹം കണ്ടെത്തിയത്. ശരീരത്തില്‍ പലയിടത്തായി മുറിവുകളുണ്ടെന്ന് പോലീസ് പറയുന്നു. റിന്‍സണ്‍ ഉപയോഗിച്ചിരുന്ന കാര്‍ ഇതുവരെ കണ്ടെത്താനായിട്ടില്ല..

മാര്‍ച്ച് 18 നാണ് റിന്‍സണെ കാണാതായത്. സമയം കഴിഞ്ഞു വീട്ടിലെത്താതിരുന്നപ്പോള്‍ ബന്ധുക്കള്‍ ഫോണില്‍ വിളിച്ചിരുന്നെങ്കിലും ഫോണ്‍ സ്വിച്ച് ഒാഫ് ആയിരുന്നു. ഒല കമ്പനി വിവരമനുസരിച്ച് കാണാതായ ദിവസം രാത്രി പതിനൊന്നുമണിക്കാണ് അവസാനത്തെ ട്രിപ്പ് ബുക്ക് ചെയ്തിരുന്നത്. സംഭവത്തില്‍ പോലീസ് കേസെടുത്ത് അന്വേഷണം ആരംഭിച്ചു.