എംജെ അക്ബർ രാജി വെക്കില്ല; നിയമനടപടിയുമായി മുന്നോട്ട്

മീടു ആരോപണത്തിൽ നിലപാട് വ്യക്തമാക്കി കേന്ദ്ര വിദേശകാര്യ സഹമന്ത്രി എംജെ അക്ബര്‍. തനിക്കെതിയെ ഉയര്‍ന്ന ആരോപണങ്ങള്‍ തെറ്റാണെന്നും കെട്ടിച്ചമച്ചതാണെന്നും ഇതിനെതിരെ നിയമനടപടി സ്വീകരിക്കുമെന്നും അക്ബര്‍ പ്രസ്താവനയിൽ അറിയിച്ചു.

തെളിവുകളില്ലാതെ ഉയര്‍ന്ന ആരോപണങ്ങള്‍ ചിലരുടെയിടയിൽ വൈറല്‍ ആയിട്ടുണ്ടെന്നും അടിസ്ഥാനമില്ലാത്ത ആരോപണങ്ങള്‍ തന്‍റെ അഭിഭാഷകര്‍ പരിശോധിക്കുമെന്നും എംജെ അക്ബര്‍ പറഞ്ഞു. ആഫ്രിക്കൻ പര്യടനം പൂര്‍ത്തിയാക്കി രാജ്യത്ത് തിരിച്ചെത്തിയ ശേഷമായിരുന്നു അക്ബറിന്‍റെ പ്രസ്താവന. താൻ മുൻപ് വിദേശത്തായിരുന്നതുകൊണ്ടാണ് പ്രതികരിക്കാതിരുന്നതെന്നും അക്ബറിന്‍റെ പ്രസ്താവനയിൽ പറഞ്ഞിട്ടുള്ളതായി എഎൻഐ റിപ്പോര്‍ട്ട് ചെയ്തു.

പൊതുതെരഞ്ഞെടുപ്പ് നടക്കാൻ മാസങ്ങള്‍ മാത്രം ബാക്കി നിൽക്കേ ആരോപണം ഉയരാൻ കാരണമെന്താണെന്നും ഇതിനു പിന്നിൽ അജണ്ടയുണ്ടോയെന്നും പ്രസ്താവനയിൽ ആരാഞ്ഞു. ആരോപണങ്ങള്‍ക്ക് പിന്നിൽ പകയും അസൂയയുമാണ്. അടിസ്ഥാനമില്ലാത്തതും ഗുരുതരവുമായ ആരോപണങ്ങള്‍ തന്‍റെ സൽപേരിന് കളങ്കമുണ്ടാക്കി. നുണകള്‍ക്ക് കാലുകളില്ല, പക്ഷെ അതിൽ വിഷമുണ്ട്. ഈ അവസ്ഥ വിഷമകരമാണെന്നും അക്ബര്‍ പ്രസ്താവനയിൽ കുറിച്ചു.