റഫാൽ: കോൺഗ്രസ് ശ്രമിക്കുന്നത് നുണ ഭക്ഷിച്ച് ജീവിക്കാനെന്ന് മോദി

ന്യൂഡൽഹി: റഫാൽ ഇടപാടുമായി ബന്ധപ്പെട്ട വിഷയത്തിൽ കോൺഗ്രസിന് മറുപടിയുമായി പ്രധാനമന്ത്രി നരേന്ദ്ര മോദി. സേനയെ ദുര്‍ബലപ്പെടുത്തുന്ന ശക്തികള്‍ക്കൊപ്പമാണ് കോൺഗ്രസ് എന്നും ചിലര്‍ പറയുന്നത് സുപ്രീം കോടതി വരെ നുണ പറയുകയാണെന്നാണെന്നും മോദി ആരോപിച്ചു. റഫാൽ വിഷയത്തിൽ കോൺഗ്രസ് സുപ്രീം കോടതിയ്ക്കെതിരെ കള്ളപ്രചാരണം നടത്തുകയാണെന്നും അദ്ദേഹം ആരോപിച്ചു.

സിഎജി റിപ്പോര്‍ട്ട് പാര്‍ലമെന്‍റ് പബ്ലിക് അക്കൗണ്ട്സ് കമ്മിറ്റി പരിഗണിക്കുന്നതിനായി കേന്ദ്രം കോടതിയെ തെറ്റിദ്ധരിപ്പിക്കുകയായിരുന്നുവെന്ന കോൺഗ്രസിന്‍റെ ആരോപണത്തിനു മറുപടി പറയുകയായിരുന്നു മോദി. സത്യം വിജയിച്ചെന്നും ഒരു കള്ളത്തിനും ആയുസ്സില്ലെന്നും മോദി അവകാശപ്പെട്ടു.

അതേസമയം വിധിയിലെ തെറ്റായ പരാമര്‍ശം സംബന്ധിച്ച് കേന്ദ്രം നല്‍കിയ അപേക്ഷ സുപ്രീം കോടതി പരിഗണിക്കുന്നത് ഡിസംബര്‍ 19ന് ശേഷമായിരിക്കും. റഫാൽ ഇടപാട് സംബന്ധിച്ച വിവരങ്ങള്‍ സിഎജിയ്ക്ക് കൈമാറിയിട്ടുണ്ടെങ്കിലും സിഎജി റിപ്പോര്‍ട്ട് പാര്‍ലമെന്‍റ് പിഎസിയ്ക്ക് കൈമാറിയെന്ന വിധിയിലെ പരാമര്‍ശം തെറ്റാണെന്നാണ് ചൂണ്ടിക്കാണിക്കപ്പെട്ടത്.

അതേസമയം കോടതിയിൽ തെറ്റായ സത്യവാങ്മൂലം നല്‍കിയതിന് നിയമമന്ത്രിയും നിയമസെക്രട്ടറിയും അറ്റോര്‍ണി ജനറലും രാജിവെക്കണമെന്ന് എൻസിപി ആവശ്യപ്പെട്ടു. വിധിയിലെ പിഴവ് തിരുത്തണമെന്ന് കേന്ദ്രസര്‍ക്കാര്‍ തന്നെ ആവശ്യപ്പെട്ടത് പ്രതിപക്ഷത്തിന് പാര്‍ലമെന്‍റിൽ ആയുധമായേക്കും.