BJP പരസ്യത്തിനായി മോദി സര്‍ക്കാര്‍ ചിലവിട്ടത് 4343 കോടി രൂപ

ബിജെപി സര്‍ക്കാര്‍ കേന്ദ്രത്തില്‍ അധികാരത്തിലേറിയ ശേഷം പരസ്യത്തിന് മാത്രമായി ചെലവഴിച്ചത് 4343 കോടിരൂപയെന്ന് വിവരാവകാശരേഖ. വിവരാവകാശപ്രവര്‍ത്തകനായ അനില്‍ ഗല്‍ഗാലി സമര്‍പ്പിച്ച അപേക്ഷയില്‍ വാര്‍ത്താവിതരണ പ്രക്ഷേപണ മന്ത്രാലയം നല്‍കിയ മറുപടിയിലാണ് ഇക്കാര്യം വ്യക്തമാക്കിയിരുന്നത്.

പത്ര-ഇലക്ടോണിക് മാധ്യമങ്ങളിലാണ് മോദി സര്‍ക്കാര്‍ പരസ്യത്തിനായി തുക ചെലവഴിച്ചിട്ടുള്ളത്. പത്രമാധ്യമങ്ങളില്‍ ഇതിനായി 1732.5 കോടി രൂപയാണ് 2014 ജൂണ്‍ 1 മുതല്‍ 2017 ഡിസംബര്‍ 7 വരെ ചെലവഴിച്ചത്. ഇലക്ട്രോണിക് മാധ്യമങ്ങളില്‍ പരസ്യത്തിനായി ചെലവഴിച്ചത് 2014 ജൂണ്‍ 1 മുതല്‍ ഈ വര്‍ഷം മാര്‍ച്ച് 31 വരെ 2079.87 കോടി രൂപയാണ്.

531.24 കോടി രൂപ പുറമേയുള്ള പബ്ലിസിറ്റിക്കായി ജൂണ്‍ 2014 മുതല്‍ 2018 ജനുവരി വരെ ചെലവാക്കിയത്. അച്ചടി മാധ്യമങ്ങളില്‍ പത്രം, മാഗസിന്‍, എന്നിവയും ഇലക്ടോണിക് മാധ്യമങ്ങളില്‍ ടി.വി, ഇന്റര്‍നെറ്റ്, റേഡിയോ, ഡിജിറ്റല്‍ സിനിമ, എസ്.എം.എസ് എന്നിവയുമാണെന്ന് ബ്യൂറോ ഓഫ് ഔട്ട്‌റീച്ച് കമ്യൂണിക്കേഷന്റെ ഉപദേശകന്‍ തപന്‍ സൂത്രാധര്‍ നല്‍കിയ റിപ്പോര്‍ട്ടില്‍ പറയുന്നുണ്ട്.