മോദി നല്ല നടനും പ്രാസംഗികനുമായാൽ ജനങ്ങളുടെ പട്ടിണി മാറ്റാനാവില്ലല്ലോ: സോണിയ

പ്രധാനമന്ത്രി നരേന്ദ്ര മോദിയെ രൂക്ഷമായി വിമര്‍ശിച്ച് കോൺഗ്രസ് മുൻ അധ്യക്ഷ സോണിയ ഗാന്ധി. കർണാടക തെരഞ്ഞെടുപ്പ് പ്രചാരണത്തോടനുബന്ധിച്ച് ബിജാപുരിലെ വേദിയിൽ നടത്തിയ പ്രസംഗത്തിലാണ് സോണിയയുടെ പരാമര്‍ശം. എല്ലാത്തിനെയും കുറിച്ച് ഒരുപാടു സംസാരിക്കുന്ന മോദി ഗൗരവമുള്ള വിഷയങ്ങളിൽ മൗനിയാകുകയാണ്. അഴിമതിക്കെതിരെ എങ്ങിനെ പോരാടുമെന്നാണു മോദി പറയുന്നതെന്നും നാലു വർഷത്തിനിടെ എന്തെങ്കിലും വാഗ്ദാനങ്ങൾ മോദി പാലിച്ചോ എന്നും സോണിയ ചോദിച്ചു. തെരഞ്ഞെടുപ്പു റാലികളിൽ രണ്ടു വർഷത്തിലേറെയായി വിട്ടുനിൽക്കുകയായിരുന്ന സോണിയ ഇന്ന് കര്‍ണാടകയിലെത്തിയത് ഏറെ മാധ്യമങ്ങളുടെ ശ്രദ്ധ പിടിച്ചു പറ്റിയിരുന്നു.



പ്രസംഗത്തിനിടെ കര്‍ണ്ണാടകയിലെ സിദ്ധരാമയ്യ സർക്കാരിന്‍റെ ഭരണനേട്ടങ്ങളും സോണിയ അക്കമിട്ട് നിരത്താൻ മറന്നില്ല. മോദി സർക്കാരിന് നല്ല കാര്യങ്ങളോടു എതിർപ്പാണെന്നും ബിജെപി ഭരിക്കുന്ന സംസ്ഥാനങ്ങൾക്കു ആയിരക്കണക്കിനു കോടി രൂപ നൽകുമ്പോൾ കർണാടകയിലെ കർഷകർക്ക് ഒന്നും ലഭിച്ചില്ലെന്നും സെണിയ ചൂണ്ടിക്കാട്ടി. ഇതാണോ കേന്ദ്ര സർക്കാരിന്‍റെ ‘എല്ലാവർക്കും ഒപ്പം, എല്ലാവർക്കും വികസനം’ എന്ന മുദ്രാവാക്യം കൊണ്ട് അര്‍ത്ഥമാക്കുന്നതെന്നും സോണിയ ഗാന്ധി ചോദിച്ചു.