കേരളത്തിന് കൂടുതൽ കേന്ദ്രസഹായം നൽകുമെന്ന് രാജ്നാഥ് സിങ്

ന്യൂഡൽഹി: പ്രളയത്തിൽ സംസ്ഥാനത്തിനുണ്ടായ നാശനഷ്ടങ്ങളുടെ കണക്കെടുപ്പ് പൂര്‍ത്തിയായാൽ കേന്ദ്രസര്‍ക്കാരിൽ നിന്ന് കേരളത്തിന് കൂടുതൽ ധനസഹായം നല്‍കുമെന്ന് കേന്ദ്ര ധനമന്ത്രി അരുൺ ജെയ്റ്റ്ലി. കേരളം രേഖാമൂലം സമര്‍പ്പിക്കുന്ന ആവശ്യങ്ങള്‍ കേന്ദ്രം പരിഗണിക്കും. ദുരിതാശ്വാസപ്രവര്‍ത്തനങ്ങളിൽ മാത്രമല്ല, പുനരധിവാസവുമായി ബന്ധപ്പെട്ട കാര്യങ്ങളിലും കേന്ദ്രസര്‍ക്കാര്‍ ശ്രദ്ധ ചെലുത്തുന്നുണ്ടെന്ന് അദ്ദേഹം വ്യക്തമാക്കി.

ക്ലെയിമുകള്‍ വേഗത്തിൽ തീര്‍പ്പാക്കാൻ ഇൻഷുറൻസ് കമ്പനികള്‍ക്കും വായ്പകള്‍ അനുവദിക്കാൻ ബാങ്കുകള്‍ക്കും നിര്‍ദേശം നല്‍കിയിട്ടുണ്ട്. കേന്ദ്രം ആദ്യം നല്‍കിയ 600 കോടി ഇടക്കാല ആശ്വാസം മാത്രമാണ്. സംസ്ഥാനപ്രതിനിധികള്‍ക്കൊപ്പം കേന്ദ്രസംഘം ദുരിതബാധിതപ്രദേശങ്ങള്‍ സന്ദര്‍ശിച്ച ശേഷമായിരിക്കും കണക്കെടുപ്പ് പൂര്‍ത്തിയാക്കി തുക തീരുമാനിക്കുക. എൻഡിഎ ഭരിക്കുന്നതോ അല്ലാത്തതോ ആയ എല്ലാ സംസ്ഥാനങ്ങളിലും ഇതേ നടപടിക്രമങ്ങളാണ് ഉള്ളതെന്നും അദ്ദേഹം വ്യക്തമാക്കി.