അമ്മ കുഞ്ഞിനെ വിറ്റു; 200 രൂപയ്ക്ക് വേണ്ടി

അഗർത്തല: നൊന്തുപെറ്റ കുഞ്ഞിനെ അമ്മ 200 രൂപയ്ക്ക് വിറ്റു. ത്രിപുരയിൽ ആണ് സംഭവം. ലക്ഷ്മിപുരിൽ നിന്നുള്ള ധൻഷയി എന്ന ഓട്ടോ ഡ്രൈവര്‍ക്കാണ് ഏപ്രിൽ 13ന് കുഞ്ഞിനെ വിറ്റത്. അതേസമയം, തൻ്റെ സമ്മതമില്ലാതെയാണ് കുഞ്ഞിനെ വിറ്റതെന്ന് കുട്ടിയുടെ പിതാവ് പറഞ്ഞു.

സംഭവം ഗ്രാമത്തലവൻ്റെ മുമ്പിൽ എത്തിയതോടെയാണ് പുറംലോകം ഇക്കാര്യം അറിഞ്ഞത്. ഗ്രാമത്തലവൻ്റെ നേതൃത്വത്തിൽ കുഞ്ഞിനെ തിരികെ വാങ്ങാൻ ഓട്ടോ ഡ്രൈവറെ സമീപിച്ചെങ്കിലും കുഞ്ഞിൻ്റെ അമ്മ ആവശ്യപ്പെട്ടാൽ കുഞ്ഞിനെ തിരികെ നൽകാമെന്ന നിലപാടിലാണ് ഓട്ടോ ഡ്രൈവർ.

കുട്ടിയുടെ അമ്മ ദാരിദ്ര്യരേഖയ്ക്ക് താഴെയുള്ള ആദിവാസി സ്ത്രീയാണ്. രണ്ടു വയസ്സുള്ള തൻ്റെ ആൺകുഞ്ഞിനെയാണ് ഇവർ വിറ്റത്. കുട്ടിയെ വീണ്ടെടുക്കാനുള്ള ശ്രമങ്ങള്‍ സാമൂഹിക ക്ഷേമ വകുപ്പിന്റെ നേതൃത്വത്തില്‍ നടക്കുകയാണ്.

രണ്ട് ആഴ്ചയ്ക്കുള്ളിൽ സംസ്ഥാനത്ത് ഇത് രണ്ടാം തവണയാണ് കുഞ്ഞിനെ വിറ്റ സംഭവം റിപ്പോർട്ട് ചെയ്യപ്പെടുന്നത്. 11 ദിവസം മാത്രം പ്രായമായ തൻ്റെ ആണ്‍കുഞ്ഞിനെ 5000 രൂപയ്ക്ക് ഒരു ആദിവാസി അമ്മ വിറ്റിരുന്നു. കുഞ്ഞിനെ വിറ്റത് ഭര്‍ത്താവിന്റെ ചികിത്സയ്ക്ക് പണം കണ്ടെത്താൻ ആയിരുന്നു എന്നാണ് ഇവർ നൽകിയ വിശദീകരണം.

Mother sells child for Rs. 200 in Tripura

A tribal in Tripura has been reported to sell her child for mere 200 rupees.