മുദ്രാ വായ്പ ബാങ്കിങ് രംഗത്തെ അടുത്ത പ്രതിസന്ധി: രഘുറാം രാജൻ

ന്യൂഡൽഹി: രാജ്യത്തെ ബാങ്കിങ് മേഖലയിൽ അടുത്തതായി വരുന്ന വലിയ പ്രതിസന്ധി മുദ്രാ വായ്പകളിൽ നിന്നായിരിക്കുമെന്ന് മുൻ റിസര്‍വ് ബാങ്ക് ഗവര്‍ണര്‍ രഘുറാം രാജൻ. ബാങ്കുകളിലെ നിഷ്ക്രിയ ആസ്തി സംബന്ധിച്ച് പാര്‍ലമെന്‍റിന്‍റെ എസ്റ്റിമേറ്റ്സ് കമ്മിറ്റിയ്ക്ക് സമര്‍പ്പിച്ച റിപ്പോര്‍ട്ടിലാണ് രഘുറാം രാജന്‍റെ മുന്നറിയിപ്പ്.

2015ലാണ് കേന്ദ്രസര്‍ക്കാര്‍ അസംഘടിത മേഖലയിലെ ചെറുകിട, ഇടത്തരം വ്യവസായങ്ങള്‍ക്കും സ്വയംസഹായസംഘങ്ങള്‍ക്കുമായി മുദ്രാ വായ്പ അവതരിപ്പിച്ചത്. എൻഡിഎ സര്‍ക്കാരിന്‍റെ പ്രധാനമന്ത്രി മുദ്രാ യോജനയുടെ ഭാഗമാണിത്.

വലിയ തോതിൽ വായ്പകള്‍ നല്‍കുന്നതിൽ നിന്നും എഴുതിത്തള്ളുന്നതിൽ നിന്ന് സര്‍ക്കാര്‍ പിന്തിരിയണം. മുദ്രാ വായ്പയും കിസാൻ ക്രെഡിറ്റ് കാര്‍ഡും ജനകീയമാണെന്നും എന്നാൽ തിരിച്ചടവിന്‍റെ കാര്യത്തിൽ ഇവയെ സൂക്ഷ്മമായി നിരീക്ഷിക്കണമെന്നും അദ്ദേഹം റിപ്പോര്‍ട്ടിൽ മുന്നറിയിപ്പ് നല്‍കി.