സിപിഎം മഹാരാഷ്ട്ര സെക്രട്ടറി ബിജെപിയിൽ ചേർന്നിട്ടില്ല: അശോക് ധാവ്ലെ

മുംബൈ: മഹാരാഷ്ട്ര സംസ്ഥാന സെക്രട്ടറി ബിജെപിയിലേക്ക് എന്നുള്ളതരത്തിൽ പ്രചരിക്കുന്ന വാർത്ത വ്യാജമാണെന്ന് സിപിഎം കേന്ദ്ര കമ്മിറ്റി അംഗം അശോക് ധാവ്ലെ. "സിപിഐ എം മഹാരാഷ്‌ട്ര സംസ്ഥാന സെക്രട്ടറി ബിജെപിയിലേക്ക്‌' എന്നുള്ള തലക്കെട്ടിൽ ഒരു പോർട്ടലിൽനിന്നും വാർത്ത പ്രചരിച്ചിരുന്നു. നരസയ്യ ആദം എന്ന പേരുപോലും തെറ്റിച്ചാണ് കൊടുത്തിരിക്കുന്നതെന്നും അശോക് ധാവ്ലെ പറഞ്ഞു. നരസയ്യ ആദം പാർട്ടിയിലെ അച്ചടക്കമുള്ള മുതിർന്ന നേതാവാണ്. സോലാപൂരിൽ പ്രധാനമന്ത്രി പങ്കെടുത്ത പരിപാടിയിൽ നടത്തിയ പ്രസംഗത്തിൽ വരുത്തിയ പിഴവിനാണ് മൂന്നുമാസത്തേക്ക് അദ്ദേഹത്തെ സസ്പെന്റ് ചെയ്തത്. തനിക്കുപറ്റിയ തെറ്റ് മനസിലാക്കുന്നെന്നും പാർട്ടിയുടെ തീരുമാനം അംഗീകരിക്കുന്നെന്നുമാണ് അദ്ദേഹം പറഞ്ഞതെന്നും ധാവ്ലെ പറഞ്ഞു.

മൂന്നുതവണ എംഎൽഎയും നിലവിലെ സിപിഎം മഹാരാഷ്ട്ര സംസ്ഥാന സെക്രട്ടറിയുമായ ആദം മാസ്റ്റർക്കെതിരെ സിപിഎം കേന്ദ്ര കമ്മിറ്റിയാണ് അച്ചടക്ക നടപടി സ്വീകരിച്ചത്.