എന്താണ് 'ഒരു രാജ്യം ഒറ്റ വോട്ടര്‍ പട്ടിക'? പുതിയ ആശയം നടപ്പാക്കാനൊരുങ്ങി കേന്ദ്രം, സംസ്ഥാനങ്ങളുമായി ചർച്ച നടത്തും

ന്യൂഡൽഹി: രാജ്യത്തെ തെരഞ്ഞെടുപ്പുകൾ ഒരുമിച്ച് നടത്താനുള്ള ആദ്യ പടിയായ 'ഒരു രാജ്യം ഒറ്റ വോട്ടര്‍ പട്ടിക' എന്ന ആശയം യാഥാർഥ്യമാക്കാനുള്ള നീക്കം ശക്തമാക്കി കേന്ദ്ര സർക്കാർ. ഭരണഘടന ഭേദഗതി ആവശ്യമായ വിഷയത്തിൽ കേന്ദ്രം ആദ്യം സംസ്ഥാന സർക്കാരുകളുടെ നിലപാട് തേടും. ഇതിന് ശേഷമായിരിക്കും കൂടുതൽ തീരുമാനങ്ങൾ കൈക്കൊള്ളുക.

Also Read: പുല്‍വാമയില്‍ ഏറ്റുമുട്ടല്‍: സൈന്യം മൂന്ന് ഭീകരരെ വധിച്ചു

തദ്ദേശ, നിയമസഭ, ലോക്‌സഭ തെരഞ്ഞെടുപ്പുകൾക്ക് ഒറ്റ വോട്ടർ പട്ടികയാണ് ലക്ഷ്യം വെക്കുന്നത്. വിഷയത്തിൽ പ്രധാനമന്ത്രി നരേന്ദ്ര മോദിയുടെ ഓഫീസ് ചർച്ചകൾ നടത്തി. പ്രധാനമന്ത്രി മുന്നോട്ട് വെച്ച ആശയത്തിൽ നടപടികൾ വേഗത്തിലുണ്ടായേക്കുമെന്നാണ് പുറത്തുവരുന്ന റിപ്പോർട്ട്.

പ്രത്യേകം തയ്യാറാക്കിയ വോട്ടർപട്ടികയാണ് തദ്ദേശഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകൾക്കായി ചില സംസ്ഥാനങ്ങളിലെ തെരഞ്ഞെടുപ്പ് കമ്മീഷൻ ഉപയോഗിക്കുന്നത്. ഇവയും കേന്ദ്ര തെരഞ്ഞെടുപ്പ് കമ്മീഷൻ്റെ വോട്ടർ പട്ടികയും തമ്മിൽ ലയിപ്പിച്ച് ഒറ്റ വോട്ടർ പട്ടിക തയ്യാറാക്കുക എന്നതാണ് കേന്ദ്രത്തിൻ്റെ പദ്ധതി. പ്രധാനമന്ത്രിയുടെ പ്രിൻസിപ്പൽ സെക്രട്ടറിയുടെ നേതൃത്വത്തിലാണ് ചർച്ചകൾ നടന്നതെന്നാണ് പുറത്തുവരുന്ന വിവരം. കേരളമടക്കമുള്ള സംസ്ഥാനങ്ങളുമായി തുറന്ന ചർച്ചകൾ നടത്തി അനുകൂല തീരുമാനങ്ങൾ ഉണ്ടാക്കുന്നതിനായി കാബിനറ്റ് സെക്രട്ടറിയെ യോഗം ചുമതലപ്പെടുത്തി.

കേരളമടക്കമുള്ള ഏഴ് സംസ്ഥാനങ്ങൾ വ്യത്യസ്‌തമായ വോട്ടർപട്ടിക തദ്ദേശ തെരഞ്ഞെടുപ്പുകൾക്ക് ഉപയോഗിക്കുന്നുണ്ട്. ഈ സാഹചര്യത്തിലാണ് കാബിനറ്റ് സെക്രട്ടറി സംസ്ഥാനങ്ങളുമായി ചർച്ച നടത്തുക. ഒറ്റ വോട്ടർ പട്ടിക വരുന്നതോടെ ഇതിൻ്റെ ആവശ്യമില്ലാതെ വരുകയും ഒരു വോട്ടർ പട്ടിക ഉപയോഗിച്ച് തെരഞ്ഞെടുപ്പുകളെല്ലാം നടത്തുകയും ചെയ്യാം.

Also Read: കുറവില്ലാതെ കൊവിഡ്; 34 ലക്ഷം കടന്ന് രോഗബാധ, 76,000 ത്തിലധികം രോഗികള്‍

ഒറ്റ വോട്ടർ പട്ടിക നിലവിൽ വന്നാൽ നിരവധി ഗുണങ്ങൾ ഉണ്ടാകുമെന്ന് കേന്ദ്രം വ്യക്തമാക്കുന്നുണ്ട്. തെരഞ്ഞെടുപ്പ് ചെലവുകൾ കുറയ്‌ക്കുന്നതിനൊപ്പം ഒരു രാജ്യം ഒറ്റ തെരഞ്ഞെടുപ്പ് എന്ന ആശയം വേഗത്തിൽ നടപ്പാക്കാൻ കഴിയും. കേന്ദ്ര തെരഞ്ഞെടുപ്പ് കമ്മീഷൻ്റെ തിരിച്ചറിയൽ കാർഡുള്ളവരിൽ പലരും സംസ്ഥാനങ്ങളുടെ തദ്ദേശഭരണ തെരഞ്ഞെടുപ്പിനുള്ള വോട്ടർ പട്ടികയിൽ ഉൾപ്പെടാതെ പോകുന്നത് പതിവാണ്. ഈ വീഴ്‌ചയ്‌ക്കും ഇതിലൂടെ പരിഹാരം കാണാൻ കഴിയുമെന്ന് കേന്ദ്രം വ്യക്തമാക്കുന്നു.