മോദി അനാക്കോണ്ട; വിമര്‍ശിച്ച് ആന്ധ്ര ധനകാര്യ മന്ത്രി

ഹൈദരാബാദ്: പ്രധാനമന്ത്രി നരേന്ദ്ര മോദിയെ രൂക്ഷമായി വിമര്‍ശിച്ച് ആന്ധ്ര പ്രദേശ് ധനകാര്യ വകുപ്പ് മന്ത്രി യനമല രാമ കൃഷ‍്‍ണുഡു. രാജ്യത്തെ പ്രധാന സ്ഥാപനങ്ങള്‍ വിഴുങ്ങുന്ന കാര്യത്തില്‍ നരേന്ദ്ര മോദി അനാക്കോണ്ട പാമ്പിനെപ്പോലെയാണെന്ന് കൃഷ്‍ണുഡു പറഞ്ഞു.

"മോദിയെക്കാള്‍ വലിയ അനാക്കോണ്ട ഉണ്ടോ? രാജ്യത്തെ മുഴുവന്‍ സ്ഥാപനങ്ങളെയും വിഴുങ്ങിയ അനാക്കോണ്ടയാണ് മോദി. സിബിഐ, റിസര്‍വ് ബാങ്ക് എന്നിങ്ങനെ സ്ഥാപനങ്ങള്‍. ഇയാള്‍ എങ്ങനെയാണ് രക്ഷകനാകുന്നത്"കൃഷ്‍ണുഡു ചോദിച്ചു. കോണ്‍ഗ്രസുമായി സഹകരണം ഉറപ്പിച്ചശേഷമാണ് ടിഡിപി നേതാവിന്‍റെ പ്രതികരണം എന്നത് ശ്രദ്ധേയമാണ്.

ബിജെപിയും ഉടന്‍ തിരിച്ചടിച്ചു. അഴിമതിയുടെ രാജാവാണ് ടിഡിപി നേതാവ് എന്‍. ചന്ദ്രബാബു നായ്‍ഡു എന്നാണ് ബിജെപിയുടെ പ്രത്യാരോപണം. ബിജെപിയില്‍ നിന്ന് ഇന്ത്യയെ രക്ഷിക്കുകയാണ് തങ്ങളുടെ ദൗത്യമെന്ന് കൃഷ്‍ണുഡുവും പറഞ്ഞു.