Narendra Modi: മോദിയുടെ ആസ്‍തി 2.3 കോടിരൂപ; സ്വന്തമായി കാര്‍ ഇല്ല

ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ മൊത്തം ആസ്‍തി 2.3 കോടി രൂപ. മാര്‍ച്ച് 31ന് പിഎം ഓഫീസ്‍ സമര്‍പ്പിച്ച രേഖകള്‍ അനുസരിച്ചാണിത്.

മോദിയുടെ കൈവശമുള്ള പണം 48,944 രൂപ. കഴിഞ്ഞ വര്‍ഷം ഇത് ഒന്നരലക്ഷം രൂപയായിരുന്നു. ഗാന്ധിനഗര്‍ സ്റ്റേറ്റ് ബാങ്ക് ഓഫ് ഇന്ത്യ ശാഖയില്‍ 11.3 ലക്ഷം രൂപയുടെ നിക്ഷേപം ഉണ്ട്. സ്വന്തം പേരില്‍ വായ്‍പകള്‍ ഒന്നുമില്ല.

സ്റ്റേറ്റ് ബാങ്കില്‍ 1.07 കോടിരൂപയുടെ സ്ഥിരനിക്ഷേപം ഉണ്ട്. 2012ല്‍ ഒരു ഇന്‍ഫ്രാ. ബോണ്ട് നിക്ഷേപം നടത്തിയിട്ടുണ്ട്. ഇത് 20,000 രൂപവരും. ദേശീയ സേവിങ്‍സ്‍ സര്‍ട്ടിഫിക്കറ്റില്‍ 5.2 ലക്ഷം രൂപയുണ്ട്. ഇന്‍ഷൂറന്‍സ് പോളിസികളിലായി 1.6 ലക്ഷം രൂപയും. 1.38 ലക്ഷം രൂപയുടെ സ്വര്‍ണമോതിരവും കൈവശമുണ്ട്.

പ്രധാനമന്ത്രിയായതിന് ശേഷം സ്വര്‍ണം വാങ്ങിയിട്ടില്ല.

സ്വന്തം പേരില്‍ ഗാന്ധിനഗറില്‍ 3500 ചതുരശ്രയടി സ്ഥലമുണ്ട്. 2002ല്‍ ഇത് വാങ്ങിയപ്പോള്‍ 1.30 ലക്ഷം രൂപയായിരുന്നു. ഇപ്പോള്‍ മൂല്യം 1 കോടി രൂപ. സ്വന്തം പേരില്‍ കാര്‍ ഒന്നും വാങ്ങിയിട്ടില്ല. ഒരുതരത്തിലുള്ള മോട്ടോര്‍ വാഹനങ്ങളും മോദിക്കില്ല.