രാജ്യത്തിന് വേണ്ടത് സ്ഥിരതയുള്ള സർക്കാരാണെന്ന് അജിത് ഡോവൽ

ന്യൂഡൽഹി: അടുത്ത പത്ത് വര്‍ഷത്തേയ്ക്ക് ഭാരതത്തിന് വേണ്ടത് സ്ഥിരതയുള്ള സര്‍ക്കാരാണെന്നും ദുര്‍ബലമായ കൂട്ടുകക്ഷി സര്‍ക്കാരുകള്‍ രാജ്യപുരോഗതിയ്ക്ക് തടസ്സമാണെന്നും ദേശീയ സുരക്ഷാ ഉപദേഷ്ടാവ് അജിത് ഡോവൽ. ന്യൂഡൽഹിയിൽ സര്‍ദാര്‍ വല്ലഭായ് പട്ടേൽ അനുസ്മരണ പ്രഭാഷണം നടത്തുകയായിരുന്നു അദ്ദേഹം.

രാജ്യത്തെ കാത്തിരിക്കുന്നത് ശക്തമായ തീരുമാനങ്ങള്‍ എടുക്കേണ്ട സാഹചര്യങ്ങളാണെന്നും ദുര്‍ബലമായ അധികാരകേന്ദ്രങ്ങള്‍ക്ക് അത്തരം തീരുമാനങ്ങള്‍ എടുക്കാൻ കഴിയില്ലെന്നും അദ്ദേഹം പറഞ്ഞു. രാജ്യത്തെ സ്വകാര്യ കമ്പനികള്‍ക്ക് മികച്ച പ്രോത്സാഹനം നല്‍കണമെന്നും അദ്ദേഹം പറഞ്ഞു.

ഇന്ത്യൻ സ്വകാര്യ കമ്പനികള്‍ ഇന്ത്യൻ താത്പര്യങ്ങള്‍ ഉയര്‍ത്തിപ്പിടിക്കണം. നമ്മെ ഭരിക്കുന്നത് ജനപ്രതിനിധികളല്ല, അവരുണ്ടാക്കുന്ന നിയമങ്ങളാണ്. ജനകീയമായ നടപടികള്‍ മാത്രം എടുക്കാൻ സര്‍ക്കാരിന് കഴിഞ്ഞെന്നു വരില്ലന്നും രാജ്യത്തിന്‍റെ ആവശ്യങ്ങള്‍ നിറവേറ്റുന്നതിന് സര്‍ക്കാരിന് പ്രാധാന്യം നൽകേണ്ടി വരുമെന്നും അദ്ദേഹം പറഞ്ഞു. അത്തരം നടപടികള്‍ ജനങ്ങള്‍ക്ക് കുറച്ചു കാലത്തേയ്ക്കെങ്കിലും ചെറിയ അനിഷ്ടങ്ങള്‍ സമ്മാനിച്ചെന്നു വരാമെന്നും അദ്ദേഹം പറഞ്ഞു.

പ്രതിരോധ ഇടപാടുകളിൽ നൂറ് ശതമാനം സാങ്കേതികവിദ്യാ കൈമാറ്റം എന്നതാണ് മോദി സര്‍ക്കാരിന്‍റെ നയമെന്നും അജിത് ഡോവൽ കൂട്ടിച്ചേര്‍ത്തു.