അധികാരത്തിലെത്തിയാൽ സഹകരണ മേഖലയിൽ പിടിമുറുക്കാൻ ബിജെപി; ദേശീയ സഹകരണ നയം നടപ്പാക്കുമെന്ന് പ്രകടനപത്രിക

ന്യൂഡല്‍ഹി: വീണ്ടും അധികാരത്തിലെത്തിയാൽ ദേശീയ സഹകരണ നയം നടപ്പാക്കുമെന്ന് ബിജെപി പ്രകടനപത്രിക. സംസ്ഥാനങ്ങളുടെ കീഴിലുള്ള സഹകരണ മേഖലയെ കൈപ്പിടിയിലാക്കാനുള്ള നീക്കമെന്ന് നേരത്തേ വിമർശനമുയർന്നിട്ടുള്ള പദ്ധതിയാണിത്. നാഷനൽ കോ ഓപറേറ്റിവ് ബാങ്ക് ഓഫ് ഇന്ത്യ, ദേശീയ സഹകരണ ട്രൈബ്യൂണൽ എന്നിവ സ്ഥാപിക്കാനുള്ള വ്യവസ്ഥകൾ ഉൾക്കൊള്ളുന്നതാണ് പുതിയ നയം. സഹകരണ ബാങ്കുകളുടെ ഉപരിഘടകമായി ദേശീയ സഹകരണ ബാങ്ക് പ്രവർത്തിക്കും.

രാജ്യത്ത് 5ജി സാങ്കേതികത വ്യാപിപ്പിക്കുമെന്ന് ബിജെപിയുടെ പ്രകടന പത്രിക പറയുന്നു. കൂടാതെ 6Gയിലേക്കുള്ള വഴി തുറക്കുകയും ചെയ്യും. ഒരു രാജ്യം ഒരു തിരഞ്ഞെടുപ്പ് എന്ന ആശയവും പ്രകടന പത്രികയിലുണ്ട്.

പാചകവാതക വിതരണം രാജ്യത്താകെ പൈപ്പ് ലൈൻ വഴിയാക്കുമെന്ന് പ്രകടന പത്രിക പറയുന്നു. ലോകമാകെ രാമായണ മഹോത്സവങ്ങൾ സംഘടിപ്പിക്കും. വനിതാ സംവരണം നടപ്പാക്കും, പുതിയ ക്രിമിനൽ നിയമം ഉടൻ നടപ്പാക്കും എന്നിങ്ങനെയുള്ള വാഗ്ദാനങ്ങളും ഉണ്ട്.

രാജ്യത്ത് ഏക സിവിൽ കോഡ് നടപ്പാക്കുമെന്നും ബിജെപിയുടെ പ്രകടനപത്രിക പറയുന്നു. ലഖ്പതി ദീദി പദ്ധതി മൂന്നു കോടി വനിതകൾക്കായി വിപുലീകരിക്കും. ജൻ ഔഷധി കേന്ദ്രങ്ങളിൽ 80 ശതമാനം വിലക്കിഴിവ് നൽകും. 25 കോടി ജനവിഭാഗങ്ങളെ ദാരിദ്ര്യത്തിൽ നിന്നും മോചിപ്പിക്കുമെന്നും പ്രകടനപത്രിക വാഗ്ദാനം ചെയ്യുന്നു. പെട്രോളിയം ഉൽപ്പന്നങ്ങളുടെ നികുതി കുറയ്ക്കുമെന്നും ബിജെപി പ്രകടനപത്രിക പറയുന്നുണ്ട്.

ട്രാൻസ്ജെൻഡറുകളെ ആയുഷ്മാൻ ഭാരത് പദ്ധതിയിൽ ഉൾപ്പെടുത്തുമെന്നതാണ് മറ്റൊരു വാഗ്ദാനം. മുദ്ര ലോൺ 10 ലക്ഷത്തിൽ നിന്ന് 20 ലക്ഷമായി ഉയർത്തുമെന്ന് പ്രധാനമന്ത്രി. കൂടുതൽ ബുളളറ്റ് /വന്ദേഭാരത് ട്രെയിനുകൾ അവതരിപ്പിക്കും.

ദരിദ്ര ജനവിഭാഗങ്ങൾക്ക് മൂന്ന് കോടി ഭവനങ്ങൾ കൂടി നിർമ്മിച്ചു നൽകുമെന്നതാണ് വാഗ്ദാനങ്ങളിലൊന്ന്. സൗജന്യ റേഷൻ, ജലവിതരണം എന്നിവ അടുത്ത അഞ്ചു വർഷത്തേക്ക് കൂടി നീട്ടുമെന്നും പ്രകടനപത്രിക പറയുന്നു.