നാ​ഷ​ണ​ല്‍ ഹെ​റാ​ള്‍​ഡ് ; സോ​ണി​യ​യു​ടേ​യും രാ​ഹു​ലി​ന്‍റെ​യും ഹർജി തള്ളി

ന്യൂഡല്‍ഹി: നാഷണല്‍ ഹെറാള്‍ഡ് കേസുമായി ബന്ധപ്പെട്ട് തങ്ങള്‍ക്കെതിരായ ആദായനികുതി വകുപ്പിൻ്റെ നടപടി തടയണമെന്നാവശ്യപ്പെട്ട് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും ,സോണിയ ഗാന്ധിയും നല്‍കിയ ഹര്‍ജി ഡല്‍ഹി ഹൈക്കോടതി തള്ളി. 2011-12ല്‍ തങ്ങള്‍ നികുതി റിട്ടേണ്‍ നല്‍കിയതിന്‍റെ രേഖകള്‍ പരിശോധിക്കരുത് എന്നാവശ്യപ്പെട്ടായിരുന്നു ഹര്‍ജി. അതേസമയം സുപ്രീംകോടതിയെ സമീപിക്കാനൊരുങ്ങുകയാണ് രാഹുല്‍ ഗാന്ധി. യങ് ഇന്ത്യ കമ്പനിയിൽ ഡയറക്ടര്‍മാരായ ഇരുവരും ആ വിവരം മറിച്ചുവെച്ച്‌ ആദായ നികുതി അടച്ചതെന്നാണ് നികുതി വകുപ്പിൻ്റെ കണ്ടെത്തല്‍.

എന്നാല്‍ യങ് ഇന്ത്യ കമ്പനിയിൽ നിന്നും രാഹുല്‍ഗാന്ധിക്ക് യാതൊരു വരുമാനവും ലഭിച്ചിട്ടില്ലെന്നും അതിനാലാണ് നികുതി അടയ്ക്കാതിരുന്നതെന്നും വരുമാനം ഇല്ലാതെ നികുതി അടയ്‌ക്കേണ്ട ആവശ്യമില്ലെന്നും അദ്ദേഹത്തിന് വേണ്ടി ഹാജരായ അഭിഭാഷകന്‍ കോടതിയെ അറിയിച്ചു.യങ് ഇന്ത്യ കമ്പനിയുടെ ഓഹരി കൂടി കണക്കാക്കുമ്പോൾ രാഹുലിൻ്റെ വരുമാനം 154 കോടി രൂപയായിരുന്നെന്നാണ് ആദായ നികുതി വകുപ്പ് കോടതിയെ അറിയിച്ചത്.

നികുതി പരിശോധനകള്‍ നടത്താന്‍ ആദായ നികുതി വകുപ്പിന് നിയമപരമായ അധികാരമുണ്ടെന്ന് ഹൈക്കോടതി വ്യക്തമാക്കി. നാഷണൽ ഹെറാൾഡ് വരുമാനം മറച്ചുവച്ചുവെന്നും കാട്ടി ബിജെപി നേതാവ് സുബ്രഹ്മണ്യന്‍ സ്വാമിയാണ് ഹര്‍ജി നല്‍കിയിരുന്നത്.