കര്‍ണാടക രാഷ്ട്രീയ നാടകങ്ങളെ 'വീരപ്പന്‍ പരീക്ഷ'യോട് ഉപമിച്ച് ദി ടെലിഗ്രാഫ്

ബെംഗലൂരു: കര്‍ണാടകത്തിലെ രാഷ്ട്രീയ നാടകങ്ങളെ 'വീരപ്പന്‍ പരീക്ഷ'യോട് ഉപമിച്ച് ദേശീയ മാധ്യമമായ ദ ടെലിഗ്രാഫ്. മുഖ്യമന്ത്രി യദ്യൂരപ്പയുടെ വിശ്വാസവോട്ടിനെ 'വീരപ്പന്‍ പരീക്ഷ'യോട് ഉപമിച്ച് മുൻ പേജിൽ തന്നെയാണ് വൻ തലക്കെട്ടോടെ വാര്‍ത്ത നല്‍കിയിരിക്കുന്നത്. വീരപ്പന്‍റെ വൻ ചിത്രത്തോടൊപ്പമാണ് വാര്‍ത്ത പ്രസിദ്ധീകരിച്ചിരിക്കുന്നത്. 14 വര്‍ഷങ്ങള്‍ക്ക് മുന്‍പ് കൊല്ലപ്പെട്ട കാട്ടുകള്ളന്‍ വീരപ്പന്‍ വെള്ള വേഷമണിഞ്ഞ ചിത്രമാണ് വാര്‍ത്തക്കൊപ്പം നൽകിയിരിക്കുന്നത്. മറ്റു എംഎല്‍എമാരെ ബിജെപി തട്ടിക്കൊണ്ടു പോകുവാന്‍ ശ്രമിക്കുന്നതിനെയാണ് ഇതിലൂടെ പരിഹസിച്ചിരിക്കുന്നത്.

കര്‍ണാടകയില്‍ കോണ്‍ഗ്രസ്- ജെ.ഡി.എസ്- ബി.ജെ.പി രാഷ്ട്രീയ പോരിന്‍റെ ചൂടു കൂടുമ്പോൾ ഇരുപക്ഷവും എം.എല്‍.എമാരെ ഒപ്പം നിര്‍ത്താനുള്ള കഠിന പരിശ്രമത്തിലാണ്. ജെ.ഡി.എസിലെ രണ്ട് എംഎൽഎമാര്‍ ബി.ജെ.പിക്കൊപ്പം ചേര്‍ന്നതായി പാര്‍ട്ടി വ്യക്തമാക്കുമ്പോൾ കോണ്‍ഗ്രസിലെ രണ്ട് എംഎൽഎമാരും രണ്ട് സ്വതന്ത്രരും ഉള്‍പ്പെടെ 20 പേരോളം തങ്ങള്‍ക്ക് പിന്തുണ നൽകുമെന്ന പ്രത്യാശയിലാണ് ബി.ജെ.പി.

എന്നാല്‍ ജെ.ഡി.എസിനൊപ്പം ബി.ജെ.പിയിലെ ആറ് എംഎൽഎ കൂടെയുണ്ടെന്ന് എച്ച്.ഡി കുമാരസ്വാമി അവകാശവാദം ഉന്നയിക്കുന്നുണ്ട്. വെക്കലിംഗ സമുദായക്കാരാണ് ഇവരെന്നും കുമാരസ്വാമി വ്യക്തമാക്കി. അതേസമയം, ഫലപ്രഖ്യാപനത്തിനു തൊട്ടുപിന്നാലെ കാണാതായ കോണ്‍ഗ്രസ് അംഗങ്ങൾ ഇന്നോടെ മടങ്ങിയെത്തുമെന്ന പ്രതീക്ഷയിലാണ് കോണ്‍ഗ്രസ്. ഇത്തരം രാഷ്ട്രീയ നാടകങ്ങളെയാണ് ടെലിഗ്രാഫിന്‍റെ മുന്‍പേജിലെ ഈ വാര്‍ത്തയിലൂടെ പരിഹസിച്ചിരിക്കുന്നത്.