മഹാരാഷ്ട്രയിൽ അധികാരം ഉറപ്പിച്ച് എൻഡിഎ; ശിവസേനയെ ഒപ്പം കൂട്ടാതെ ഭരിക്കാനാവില്ലെന്ന് തിരിച്ചറിഞ്ഞ് ബിജെപി

മുംബൈ: മഹാരാഷ്ട്രയിൽ ബിജെപി - ശിവസേന സഖ്യം ഭരണം നിലനിർത്തുമെന്ന് ഉറപ്പായി. ബിജെപിക്ക് ഒറ്റക്ക് ഭരണത്തിലെത്താൻ സാധിക്കില്ല എന്ന വസ്തുത അടിവരയിടുന്നതാണ് ഇത്തവണത്തെ ഫലം. ബിജെപിയുടെ മുഖ്യ എതിരാളിയായ കോൺഗ്രസ്- എൻസിപി സഖ്യത്തിന് ലീഡ് നില മെച്ചപ്പെടുത്താൻ സാധിച്ചു എന്നതും മറ്റൊരു വസ്തുതയാണ്.

ബിജെപി - ശിവസേന സഖ്യം 165 സീറ്റുകളിലും കോൺഗ്രസ്- എൻസിപി സഖ്യം 94 സീറ്റുകളുമാണ് നേടിയത്. അതെ സമയം ഹരിയാനയിൽ കോൺഗ്രസും ബിജെപിയും ഇഞ്ചോടിഞ്ച് പോരാട്ടം തുടരുകയാണ്. ബിജെപി 37 സീറ്റുകളിലും കോൺഗ്രസ് 33 സീറ്റുകളിലുമാണ് മുന്നിട്ട് നിൽക്കുന്നത്. ആർക്കും കേവലഭൂരിപക്ഷമില്ലാത്ത നിലക്ക് ഹരിയാനയിൽ തൂക്ക് മന്ത്രിസഭയായിരിക്കുമെന്നാണ് റിപ്പോർട്ടുകൾ.

എക്‌സിറ്റ് പോൾ ഫലങ്ങൾ തീർത്തും അപ്രസക്തമാക്കുന്ന കണക്കുകളാണ് തെരഞ്ഞെടുപ്പ് ഫലം മുന്നോട്ട് വെക്കുന്നത്. ബിജെപി വലിയ ഭൂരിപക്ഷത്തോടെ അധികാരം പിടിച്ചെടുക്കുമെന്ന എക്സിറ്റ് പോൾ പ്രവചനങ്ങൾ മഹാരാഷ്ട്രയിൽ ഫലം കണ്ടില്ല. അധികാരം പിടിച്ചെടുത്തെങ്കിലും പ്രതീക്ഷിച്ച മുന്നേറ്റം ബിജെപി - സേന സഖ്യത്തിന് ഉണ്ടാക്കാൻ സാധിച്ചില്ല.

Also Read: Haryana Election Results 2019:ഹരിയാനയിൽ തിരിച്ചടി; ബിജെപി അധ്യക്ഷൻ രാജിവെച്ചു, കോൺഗ്രസ് സർക്കാർ രൂപീകരിച്ചേക്കും

അതെ സമയം, ഹരിയാനയിൽ എന്ത് തീരുമാനവും കൈക്കൊള്ളാൻ മുൻ മുഖ്യമന്ത്രി കൂടിയായ ഭൂപീന്ദർ സിങ് ഹൂഡയ്ക്ക് പാർട്ടി അധ്യക്ഷ സോണിയ ഗാന്ധി അനുവാദം നൽകി. ജനനായക് ജനത പാർട്ടി നേതാവ് ദുഷ്യന്ത് ചൗട്ടാലയെ ഒപ്പം നിർത്താനാണ് കോൺഗ്രസും ബിജെപിയും ശ്രമിക്കുന്നത്. 14 സീറ്റുകളിൽ വ്യക്തമായ ലീഡ് നേടിയ ദുഷ്യന്ത് ചൗട്ടാലയുടെ നേതൃത്വത്തിലുള്ള ജെജെപിയായിരിക്കും ഭരണം തീരുമാനിക്കുക എന്നാണ് സൂചന.

ഭരണം നിലനിർത്താനായെങ്കിലും മഹാരാഷ്ട്രയിൽ ബിജെപിക്ക് 20 സീറ്റുകളാണ് നഷ്ടമായത്. 185 സീറ്റുകൾ ഉണ്ടായിരുന്ന ബിജെപി ശിവസേന സഖ്യത്തിന് 20 സീറ്റുകൾ നഷ്ടമായതോടെ 165 സീറ്റുകളാണ് ഇത്തവണ നേടാനായത്. ശിവസേന തങ്ങളുടെ മണ്ഡലങ്ങൾ ഭദ്രമാക്കിയപ്പോൾ ബിജെപിക്ക് പ്രതീക്ഷയുണ്ടായിരുന്ന പല മണ്ഡലങ്ങളും നഷ്ടമായി. ഈ നിലയിൽ ശിവസേനയുടെ പിന്തുണ ബിജെപിക്ക് ഉറപ്പിച്ച മതിയാകൂ.

മഹാരാഷ്ട്രയിൽ ഉദ്ധവ് താക്കറെയുടെ നേതൃത്വത്തിലുള്ള ശിവസേന മുഖ്യമന്ത്രി പദം ആവശ്യപ്പെട്ടതായാണ് സൂചന. അധികാരം പിടിച്ചെടുക്കാനായില്ലെങ്കിലും എൻസിപി - കോൺഗ്രസ് സഖ്യത്തിന് ആശ്വാസം നൽകുന്നതാണ് ഈ തെരഞ്ഞെടുപ്പ് ഫലം. കഴിഞ്ഞ തവണ 41 സീറ്റുകൾ നേടിയ എൻസിപിക്ക് ഇത്തവണ ലഭിച്ചത് 50 സീറ്റുകളാണ്. കോൺഗ്രസിന് സീറ്റുനില മെച്ചപ്പെടുത്താൻ സാധിച്ചില്ലെങ്കിലും ഉള്ള സീറ്റുകൾ നിലനിർത്താൻ സാധിച്ചുവെന്നത് ശ്രദ്ധേയമാണ്.