കർണാടകയിൽ 6,974 കൊവിഡ് കേസുകള്
കഴിഞ്ഞ 24 മണിക്കൂറിനിടെ കർണാടകയിൽ 6,974 പുതിയ കൊവിഡ് കേസുകളാണ് റിപ്പോര്ട്ട് ചെയ്തിരിക്കുന്നത്. അതിനൊപ്പം 83 മരണവും സംഭവിച്ചതായി ആരോഗ്യവകുപ്പ് വ്യക്തമാക്കി. ഇന്ന് 9,073 പേർ കൂടി ആശുപത്രി വിട്ടപ്പോൾ സംസ്ഥാനത്ത് കൊവിഡ് മുക്തി നേടിയവരുടെ എണ്ണം 4,32,450 ആയി. ഇതുവരെ 8,228 പേർക്കാണ് ജീവൻ നഷ്ടമായത്. സംസ്ഥാനത്ത് 5,33,850 കേസുകളാണ് ഇതുവരെ സ്ഥിരീകരിച്ചപ്പോൾ 93,153 പേർ വിവിധ ആശുപത്രികളിലായി ചികിത്സയിൽ കഴിയുന്നുണ്ട്. ഇന്ന് രോഗബാധ സ്ഥിരീകരിച്ചതിൽ 3,082 കേസുകളും ബെംഗളൂരു നഗരത്തിൽ നിന്നുമാണ്.
മഹാരാഷ്ട്രയിൽ ആശങ്ക ശക്തം
രാജ്യത്ത് ഏറ്റവുമധികം കൊവിഡ് കേസുകൾ നിലവിലുള്ള മഹാരാഷ്ട്രയിൽ കഴിഞ്ഞ 24 മണിക്കൂറിനുള്ളിൽ 18,390 പുതിയ കേസുകളും 392 മരണങ്ങളും സ്ഥിരീകരിച്ചു. കഴിഞ്ഞ മണിക്കൂറുകളിൽ 20,206 ഡിസ്ചാർജുകളുണ്ടായി. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 9,36,554 ആയി. 33,407 മരണങ്ങളും സംഭവിച്ചതായി അധികൃതർ വ്യക്തമാക്കുന്നു. കൊവിഡ് കേസുകൾ ഉയർന്ന തോതിലുള്ള മുംബൈയിൽ കഴിഞ്ഞ 24 മണിക്കൂറിനുള്ളിൽ 1,628 പുതിയ കൊവിഡ് കെസുകളും 47 മരണങ്ങളും റിപ്പോർട്ട് ചെയ്തു. ഇതോടെ നഗരത്തിലെ ആകെ കൊവിഡ് മരണസംഖ്യ 8,549 ആയി. 1,87,778 പേർക്കാണ് ഇവിടെ രോഗബാധയുണ്ടായത്.
തമിഴ്നാട്ടിൽ 5,337 പുതിയ കൊവിഡ് കേസുകൾ
കൊവിഡ് കേസുകൾ ഉയർന്ന തോതിലുള്ള തമിഴ്നാട്ടിൽ കഴിഞ്ഞ 24 മണിക്കൂറിനുള്ളിൽ 5337 പുതിയ കൊവിഡ് കേസുകളും 76 മരണവും സ്ഥിരീകരിച്ചു. കഴിഞ്ഞ മണിക്കൂറുകളിൽ 5406 പേർ കൂടി രോഗമുക്തി നേടി ആശുപത്രി വിട്ടാതോടെ സംസ്ഥാനത്ത് കൊവിഡ് മുക്തി നേടിയവരുടെ ആകെ എണ്ണം 4,97,377 ആയി. 8,947 പേർക്ക് ഇതുവരെ ജീവൻ നഷ്ടമായപ്പോൾ ആകെ രോഗബാധിതരുടെ എണ്ണം ഉയർന്നു. കൊവിഡ് കേസുകൾ ഉയർന്ന തോതിലുള്ള ചെന്നൈയിൽ രോഗബാധ വർധിക്കുകയാണ് സമ്പർക്കത്തിലൂടെയാണ് കൂടുതൽ കേസുകൾ.
ആന്ധ്രയിൽ കൊവിഡ് കണക്കുകളിൽ കുറവ്
പ്രതിദിനം പതിനായിരത്തിനടുത്ത് കേസുകള് റിപ്പോര്ട്ട് ചെയ്തിരുന്ന ആന്ധ്രാ പ്രദേശിൽ രോഗബാധിതരുടെ എണ്ണത്തിൽ കുറവ് റിപ്പോര്ട്ട് ചെയ്തത് ആശ്വാസകരമാണ്. കഴിഞ്ഞ 24 മണിക്കൂറിൽ സംസ്ഥാനത്ത് 7,553 പുതിയ കേസുകൾ സ്ഥിരീകരിച്ചു. ഇതോടെ സംസ്ഥാനത്തെ ആകെ രോഗമുക്തരുടെ എണ്ണം 5,62,376 കഴിഞ്ഞു. 5,461 പേരാണ് കൊവിഡ് ബാധിച്ച് മരിച്ചത്. 71,465 പേര് ചികിത്സയിലാണ്. കഴിഞ്ഞ ദിവസങ്ങളെ സംബന്ധിച്ച് ജില്ലയിലെ കൊവിഡ് കേസുകൾ കുറഞ്ഞ തോതിലാണെന്ന് ആരോഗ്യവകുപ്പ് വ്യക്തമാക്കുന്നുണ്ട്.
കേരളത്തിലെ കൊവിഡ് കേസുകൾ
കേരളത്തിൽ 4,125 പേർക്ക് ഇന്ന് കൊവിഡ് സ്ഥിരീകരിച്ചു. 3007 പേർക്ക് രോഗമുക്തിയുണ്ടായി. സമ്പർക്കത്തിലൂടെ 3,463 പേർക്ക് കൊവിഡ് സ്ഥിരീകരിച്ചതും 19 മരണങ്ങൾ കൂടി സ്ഥിരീകരിച്ചതും ആശങ്ക പകരുന്നതാണ്. 40,382 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 1,01,731 പേര് ഇതുവരെ കോവിഡില് നിന്നും മുക്തി നേടി. ഇന്ന് 9 പ്രദേശങ്ങളെയാണ് ആരോഗ്യവകുപ്പ് ഹോട്ട്സ്പോട്ടുകളാക്കിയത്. ഏഴ് പ്രദേശങ്ങളെ പട്ടികയിൽ നിന്നും ഒഴിവാക്കിയിട്ടുമുണ്ട്. ഇതോടെ നിലവില് 639 ഹോട്ട്സ്പോട്ടുകളാണുള്ളത്.