ഉദ്ഘാടനത്തിന് തിരഞ്ഞെടുത്തത് മോദി സത്യപ്രതിജ്ഞ ചെയ്ത ദിനം; മൺസൂൺ സെഷൻ പുതിയ പാർലമെന്റ് മന്ദിരത്തിൽ

എൻഡ‍ിഎ സർക്കാരിന്റെ ഒമ്പതാം വാർഷികം പ്രമാണിച്ച് പുതിയ പാർലമെന്റ് മന്ദിരം മെയ് 26ന് ഉദ്ഘാടനം ചെയ്തേക്കുമെന്ന് റിപ്പോർട്ട്. വിവിധ ദേശീയ മാധ്യമങ്ങളാണ് ഈ റിപ്പോർട്ട് പ്രസിദ്ധീകരിച്ചിരിക്കുന്നത്. പ്രധാനമന്ത്രി നരേന്ദ്രമോദി തന്നെയായിരിക്കും ഉദ്ഘാടകൻ എന്നാണറിയുന്നത്. ഇക്കാര്യത്തിൽ ഔദ്യോഗിക വിവരമൊന്നും പുറത്തുവന്നിട്ടില്ല.

2014 മെയ് 26നാണ് നരേന്ദ്രമോദി പ്രധാനമന്ത്രിയായി ആദ്യം സത്യപ്രതിജ്ഞ ചെയ്തത്. ഈ ദിനത്തിന്റെ സ്മരണയ്ക്കായാണ് മെയ് 26നു തന്നെ ഉദ്ഘാടനം നിശ്ചയിച്ചതെന്നാണ് വിവരം. 970 കോടി രൂപ ചെലവിട്ടാണ് പുതിയ മന്ദിരം നിർമ്മിച്ചിരിക്കുന്നത്.

പാർലമെന്റിന്റെ അടുത്ത മൺസൂൺ സെഷൻ പുതിയ മന്ദിരത്തിലായിരിക്കും നടക്കുക.

കഴിഞ്ഞവർഷം ജൂലൈ മാസത്തിലാണ് പുതിയ പാർലമെന്റ് മന്ദിരത്തിനു മുകളിലെ ദേശീയചിഹ്നം പ്രധാനമന്ത്രി ഉദ്ഘാടനം ചെയ്തത്. ദേശീയ ചിഹ്നത്തിന്റെ രൂപകൽപ്പന അന്ന് വിവാദമാകുകയും ചെയ്തിരുന്നു. പുതിയൊരു മ്യൂസിയവും ഒരുങ്ങുന്നുണ്ട് പാർലമെന്റ് മന്ദിരത്തിൽ. ദേശീയ മ്യൂസിയത്തിലെ കളക്ഷൻ ഇങ്ങോട്ട് മാറ്റാനാണ് പരിപാടി.

പുതിയ പാർലമെന്റ് മന്ദിരത്തിന് നാല് നിലകളാണുള്ളത്. 64,500 സ്ക്വയർ മീറ്റർ പരന്നുകിടക്കുന്നു ഈ നിർമ്മിതി. ഇരുസഭകളിലുമായി 1,224 എംപിമാരെ ഉൾക്കൊള്ളാൻ പുതിയ പാർലമെന്റിനാകും. മൂന്ന് പ്രധാന ഗേറ്റുകളാണ് മന്ദിരത്തിനുള്ളത്. ഗ്യാൻ ദ്വാർ, ശക്തി ദ്വാർ, കർമ്മ ദ്വാർ എന്നിവയാണവ. എംപിമാർക്കും സന്ദർശകർക്കുമെല്ലാം പ്രത്യേക ഗേറ്റ് വേറെയുണ്ടായിരിക്കും.

പുതിയ പാർലമെന്റ് കെട്ടിടത്തിൽ മഹാത്മാ ഗാന്ധിയുടെ ചിത്രമുണ്ടായിരിക്കുമെന്ന് റിപ്പോർട്ടുകൾ പറയുന്നു. ജവഹർലാൽ നെഹ്റു, സുഭാഷ് ചന്ദ്രബോസ് എന്നിവരുമുണ്ടാകും. വേറെ ആരെല്ലാമുണ്ടാകുമെന്ന കാര്യത്തിൽ വ്യക്തത വന്നിട്ടില്ല. ഇന്ത്യയുടെ ചരിത്രപൈതൃകം വിളിച്ചോതുന്ന ഒരു ഭരണഘടനാ ഹാൾ പുതിയ മന്ദിരത്തിലുണ്ടാകും. ഇന്ത്യൻ ഭരണഘടനയുടെ ഒരു പകർപ്പ് ഹാളിൽ സൂക്ഷിച്ചിരിക്കും. ഇത് ഭരണഘടനയുടെ മൂലപതിപ്പ് തന്നെയാണെന്നും റിപ്പോര്‍ട്ടുകളുണ്ട്.

മാർച്ച് മാസത്തിൽ പ്രധാനമന്ത്രി നരേന്ദ്രമോദി പാർലമെന്റ് മന്ദിരം സന്ദർശിച്ചിരുന്നു. നിർമ്മാണപ്രവർത്തനങ്ങളും പുരോഗതിയും അദ്ദേഹം വിലയിരുത്തി.