സിബിഐ അന്വേഷണത്തിൽ സഹകരിക്കില്ലെന്ന് നീരവ് മോദി

ന്യൂഡൽഹി: പഞ്ചാബ് നാഷണൽ ബാങ്കിൽ നിന്ന് 12000 കോടി രൂപയിലേറെ തട്ടിച്ച കേസിൽ അന്വേഷണത്തിൽ സഹകരിക്കില്ലെന്ന് വജ്രവ്യാപാരി നീരവ് മോദി. തനിക്കെതിരെയുള്ള കേസന്വേഷണത്തിൽ സഹകരിക്കില്ലെന്ന് വിദേശത്ത് ഒളിവിലുള്ള നീരവ് മോദി സിബിഐയെ അറിയിച്ചു.

അതേസമയം പഞ്ചാബ് നാഷണൽ ബാങ്കിൽ നിന്ന് സമ്പാദിച്ച 293 വ്യാജ ജാമ്യപത്രങ്ങളുടെ അടിസ്ഥാനത്തിൽ നീരവ് മോദിയും കൂട്ടുപ്രതിയുമായ മെഹുൽ ചോക്സിയും രാജ്യത്തിന് പുറത്ത് നടത്തിയ സാമ്പത്തിക ഇടപാടുകളുടെ വിശദാംശങ്ങള്‍ നല്‍കാൻ അഞ്ച് ബാങ്കുകളുടെ വിദേശശാഖകളോട് സിബിഐ ആവശ്യപ്പെട്ടിട്ടുണ്ട്.

കാനറാ ബാങ്ക്, ബാങ്ക് ഓഫ് ഇന്ത്യ, സ്റ്റേറ്റ് ബാങ്ക് ഓഫ് ഇന്ത്യ, അലഹാബാദ് ബാങ്ക്, ആക്സിസ് ബാങ്ക് എന്നിവയുടെ ബെൽജിയം, ജര്‍മനി, മൗറീഷ്യസ്, ഹോങ്കോങ്, ബഹ്റൈൻ എന്നിവിടങ്ങളിലുള്ള ശാഖകളുടെ ചീഫ് വിജിലൻസ് ഓഫീസര്‍മാരിൽ നിന്നാണ് സിബിഐ വിവരം തേടിയിട്ടുള്ളത്. ഒപ്പം നീരവ് മോദിയുടെ വിദേശത്തെ വ്യാപാരവും ആസ്തികളും സംബന്ധിച്ച് തെളിവ് നല്‍കണമെന്ന് ആവശ്യപ്പെട്ട് ആറ് രാജ്യങ്ങള്‍ക്ക് കത്ത് അയ്ക്കാൻ സാമ്പത്തിക കുറ്റാന്വേഷണ വിഭാഗത്തിന് കോടതിയുടെ അനുമതി ലഭിച്ചു.