അതിർത്തിയിൽ മിന്നലാക്രമണ സൂചന നൽകി കേന്ദ്ര പ്രതിരോധ മന്ത്രി

ന്യൂഡല്‍ഹി: കേന്ദ്ര ആഭ്യന്തര മന്ത്രി രാജ്‍നാഥ് സിങിനുശേഷം മിന്നലാക്രമണത്തിന്‍റെ സൂചന നല്‍കി കേന്ദ്ര പ്രതിരോധ മന്ത്രി നിര്‍മല സീതാരാമന്‍ രംഗത്ത്. അതിര്‍ത്ഥിയില്‍ നടന്നത് നിങ്ങള്‍ ഉടന്‍ അറിയുമെന്ന് വ്യക്തമാക്കിയാണ് നിര്‍മല സീതാരാമന്‍ മിന്നലാക്രമണം നടന്നതായുള്ള സൂചന നല്‍കിയത്.

പാക്കിസ്ഥാന്‍ വെടിനിര്‍ത്തല്‍ കരാര്‍ ലംഘിച്ച് ഇന്ത്യ അതിനു മറുപടി നല്‍കുന്നുണ്ട്. അതിനെ ഇല്ലാതാക്കുകയും അവരെ പുറകോട്ടടിക്കുകയും ചെയ്യുന്നുണ്ട്. ഒന്നും ശ്രദ്ധിക്കാതെ പോകുന്നില്ലെന്നും നിര്‍മല സീതാരാമന്‍ പറഞ്ഞു.

പാക് സൈന്യത്തിനും ഭീകരര്‍ക്കുമെതിരെ വീണ്ടും സര്‍ജിക്കൽ സ്ട്രൈക്ക് നടത്തിയെന്ന സൂചനയുമായി കേന്ദ്ര ആഭ്യന്തരമന്ത്രി രാജ്‍‍നാഥ് സിങ് പറഞ്ഞിരുന്നു. ചില വലിയ കാര്യങ്ങള്‍ നടന്നിട്ടുണ്ടെന്നും അതിപ്പോള്‍ വെളിപ്പെടുത്താനാകില്ലെന്നുമായിരുന്നു രാജ്‍‍നാഥ് സിങിന്‍റെ വാക്കുകള്‍. സാംബ ജില്ലയിൽ കൊല്ലപ്പെട്ട ബിഎസ്എഫ് ജവാൻ നരേന്ദ്ര സിങിന്‍റെ മരണത്തിന് പിന്നാലെ പാക് അധീനമേഖലയിൽ ഇന്ത്യ മിന്നലാക്രമണം നടത്തിയെന്ന് അഭ്യൂഹങ്ങള്‍ പരന്നിരുന്നു. ഇതിനിടെയാണ് ഇതിൽ കൂടുതൽ വ്യക്തത വരുത്തുന്ന പ്രസ്താവനയുമായി കേന്ദ്ര ആഭ്യന്തരമന്ത്രി തന്നെ രംഗത്തെത്തിയത്.

രാജ്‍നാഥ് സിങ്ങിനു പുറമേ അതിര്‍ത്ഥി രക്ഷാ സേന മേധാവി കെ.കെ ശര്‍മ്മയും തിരിച്ചടി നല്‍കി എന്ന സൂചനകളുമായി രംഗത്തെത്തിയിരുന്നു.