2024 മുതല്‍ ലോക്‌സഭാ-നിയമസഭാ തെരഞ്ഞെടുപ്പുകള്‍ ഒരുമിച്ച്: നീതി ആയോഗ്

ന്യൂഡല്‍ഹി: ഭരണം തടസപ്പെടുന്നത് ഒഴിവാക്കാന്‍ 2024 മുതല്‍ ലോക്സഭാ-നിയമസഭാ തെരഞ്ഞെടുപ്പുകള്‍ ഒരുമിച്ച് നടത്തണമെന്ന് നീതി ആയോഗ്. ഇതിനായി ചില സംസ്ഥാനങ്ങളിലെ നിയമസഭകളുടെ കാലാവധി ഒറ്റത്തവണ മാത്രം വെട്ടിക്കുറയ്‍ക്കുകയോ നീട്ടുകയോ ചെയ്യേണ്ടിവരുമെന്നും നീതി ആയോഗ് അഭിപ്രായപ്പെട്ടു.

രണ്ടും തെരഞ്ഞെടുപ്പുകളും ഒരുമിച്ച് നടത്തുന്നതിനായി കേന്ദ്ര തെരഞ്ഞെടുപ്പു കമ്മീഷനെ നോഡല്‍ ഏജന്‍സിയായി നിയമിച്ചു. കമ്മീഷന്‍ നിര്‍ദേശങ്ങള്‍ പരിഗണിച്ച് ഇതുമായി ബന്ധപ്പെട്ട കക്ഷികളുമായി ചര്‍ച്ച ചെയ്‍ത് പദ്ധതി തയ്യാറാക്കും.

ഇതിനായി ആറുമാസത്തിനുള്ളില്‍ റിപ്പോര്‍ട്ട് തയ്യാറാക്കണമെന്നും അടുത്ത വര്‍ഷം മാര്‍ച്ചോടെ പദ്ധതി മാര്‍ഗരേഖ ലഭ്യമാക്കണമെന്നും നീതി ആയോഗ് ആവശ്യപ്പെട്ടിട്ടുണ്ട്. ഏപ്രില്‍ 23 ന് നടന്ന യോഗത്തില്‍ നീതി ആയോഗിന്‍റെ ഭരണ സമിതി അംഗങ്ങള്‍ക്ക് കരട് രൂപരേഖ വിതരണം ചെയ്‍തു. രണ്ടു തെരഞ്ഞെടുപ്പുകളും ഒരുമിച്ച് നടത്തണമെന്ന് രാഷ്ട്രപതി പ്രണബ് മുഖര്‍ജിയും പ്രധാന മന്ത്രി നരേന്ദ്ര മോദിയും അഭിപ്രായപ്പെട്ട സാഹചര്യത്തില്‍ നടപടികള്‍ വേഗത്തിലുണ്ടാകുമെന്നാണ് പ്രതീക്ഷിക്കപ്പെടുന്നത്.

Niti Aayog suggests simultaneous Lok Sabha, assembly polls from 2024

The policy think-tank has said implementing the proposal may necessitate "a maximum one-time curtailment or extension of some state assemblies".