നിതീഷ് കുമാര്‍ വിശ്വാസ വോട്ട് നേടി: നേടിയത് 131 വോട്ട്

ന്യൂഡല്‍ഹി: ബിഹാര്‍ നിയമസഭയില്‍ ജെഡിയു നേതാവ് നിതീഷ് കുമാര്‍ വിശ്വാസ വോട്ട് നേടി. 131 എംഎല്‍എമാരുടെ പിന്തുണ നേടിയാണ് നിതീഷ് വിശ്വാസ വോട്ടെടുപ്പില്‍ ജയിച്ചത്. ഇതോടെ ബിജെപിയുടെ പിന്തുണയോടെ നിതീഷിന്‍റെ നേതൃത്വത്തിലുള്ള മന്ത്രിസഭ ബിഹാറില്‍ നിലവില്‍വരും.

243 അംഗ നിയമസഭയില്‍ വിശ്വാസ വോട്ട് നേടാന്‍ 122 എംഎല്‍എമാരുടെ പിന്തുണയാണ് വേണ്ടിയിരുന്നത്. ജെഡിയുവിന് 71 എംഎല്‍എമാരും എന്‍ഡിഎയ്‍ക്ക് 58 എംഎല്‍എമാരുമാണ് സഭയില്‍ നിലവിലുള്ളത്. ഇതുപ്രകാരം നിതീഷിന് കിട്ടേണ്ടിയിരുന്നത് 129 വോട്ടാണ്. എന്നാല്‍ 131 വോട്ട് നേടിയത് പ്രതിപക്ഷത്തുനിന്നുള്ള വോട്ട് ചോര്‍ച്ചയിലേക്കാണ് വിരല്‍ചൂണ്ടുന്നത്.

ബുധനാഴ്‍ച വൈകീട്ടാണ് സഖ്യകക്ഷിയായിരുന്ന ആര്‍ജെഡിയുമായുള്ള തര്‍ക്കത്തെത്തുടര്‍ന്ന് നിതീഷ് കുമാര്‍ ബിഹാര്‍ മുഖ്യമന്ത്രിസ്ഥാനം രാജിവെച്ചത്. ആര്‍ജെഡി നേതാവ് ലാലു പ്രസാദ് യാദവിന്‍റെ മകനും ഉപമുഖ്യമന്ത്രിയുമായ തേജസ്വി യാദവിനെതിരെ സിബിഐ അഴിമതി കേസ് രജിസ്റ്റര്‍ ചെയ്‍തതിനെത്തുടര്‍ന്ന് ഉടലെടുന്ന പ്രശ്‍നങ്ങളാണ് നിതീഷിന്‍റെ രാജിയില്‍ കലാശിച്ചത്. തേജസ്വി ഉപമുഖ്യമന്ത്രി പദം ഒഴിയണമെന്ന നിതീഷിന്‍റെ ആവശ്യം ആര്‍ജെഡി തള്ളിയതോടെയാണ് നിതീഷ് രാജിവെച്ചത്.

Nitish Kumar wins trust vote

Bihar Chief Minister Nitish Kumar wins trust vote in the state assembly.