ബാങ്ക് ലോക്കറുകള്‍ പൂട്ടാന്‍ സര്‍ക്കാരിന് പദ്ധതിയില്ല

ന്യൂഡൽഹി: ബാങ്ക് ലോക്കറുകൾ പൂട്ടി സീല് ചെയ്യാനോ ജനങ്ങളുടെ കൈയിലുള്ള സ്വർണം കണ്ടുക്കെട്ടാനോ പദ്ധതിയില്ലെന്ന് കേന്ദ്ര ധനമന്ത്രാലയം അറിയിച്ചു. പുതിയ 2000 രൂപയുടെ നോട്ടുകളിൽ നിന്ന് മഷി ഇളകുന്നു എന്ന വാർത്തയും മന്ത്രാലയം തള്ളി.

ഇത്തരം പ്രചരണങ്ങൾ തികച്ചും അടിസ്ഥാനരഹിതമാണെന്ന് ധനമന്ത്രാലയം ട്വിറ്ററിലൂടെ അറിയിച്ചു. പുതിയ 2000 രൂപ നോട്ടുകളിൽ ശക്തമായ സുരക്ഷ സജ്ജീകരണം ഒരുക്കിയിട്ടുണ്ടെന്നും മന്ത്രാലയം വ്യക്തമാക്കി. ഇന്‍റാഗ്ളിയോ (ഒരു പ്രത്യേക ഡിസൈൻ പതിപ്പിക്കുക) എന്ന ഏറ്റവും പുതിയ സാങ്കേതിക വിദ്യ ഓരോ നോട്ടിലും ഉപയോഗിച്ചിട്ടുണ്ടെന്ന് മന്ത്രാലയം ഇറക്കിയ കുറിപ്പിൽ പറയുന്നു. യഥാർഥ നോട്ടു തന്നെയാണോ നിങ്ങൾക്ക് ലഭിച്ചതെന്നറിയാൻ ഒരു തുണി ഉപയോഗിച്ച് തുടക്കുമ്പോൾ ഇന്‍റാഗ്ളിയോ എന്ന സംവിധാനം ഉപയോഗിച്ചിരിക്കുന്നതിനാൽ നോട്ടിലെ നിറം തുണിയിൽ പിടിക്കുമെന്നും മന്ത്രാലയം വ്യക്തമാക്കി.

അതേസമയം തുടർച്ചയായ പ്രതിപക്ഷ ബഹളത്തെ തുടർന്ന് ലോക് സഭ ഇന്നത്തേക്ക് നിർത്തി വെച്ചു. സഭ പിരിച്ചുവിടേണ്ട കാര്യമില്ലെന്നും നോട്ട് പ്രതിസന്ധി സഭയിൽ ചർച്ച ചെയ്യാൻ ഒരുക്കമാണെന്നും പാർലമെന്‍ററികാര്യ മന്ത്രി അനന്ദ്‌ കുമാർ അറിയിച്ചു.

No move to seal bank lockers, confiscate jewellery: Finance ministry