പൗരത്വ ഭേദഗതിയില്‍ കേന്ദ്രത്തിന് സുപ്രീം കോടതിയുടെ നോട്ടീസ്

ന്യൂഡല്‍ഹി: പൗരത്വ ഭേദഗതിയ്ക്കെതിരെ കേന്ദ്രത്തിന് സുപ്രീം കോടതിയുടെ നോട്ടീസ്. പൗരത്വ ഭേദഗതിയ്ക്ക് സ്റ്റേ ഇല്ല. കേസ് ജനുവരി 22 ലേക്ക് മാറ്റി. ജനുവരി രണ്ടാം വാരത്തിനുള്ളില്‍ കേന്ദ്രം മറുപടി നല്‍കണമെന്ന് കോടതി ആവശ്യപ്പെട്ടു.

ചീഫ് ജസ്റ്റിസ് എസ് എ ബോബ്‌ഡെ, ജസ്റ്റിസുമാരായ ബി ആര്‍ ഗവായ്, സൂര്യകാന്ത് എന്നിവരടങ്ങുന്ന ബെഞ്ചാണ് കേസുകള്‍ പരിഗണിച്ചത്. നിയമം സ്റ്റേ ചെയ്യരുതെന്ന് കേന്ദ്രം സുപ്രീം കോടതിയോട് ആവശ്യപ്പെട്ടു.

പൗരത്വ ഭേദഗതിയ്‌ക്കെതിരെ 60 ഹര്‍ജികളാണ് സുപ്രീം കോടതിയില്‍ സമര്‍പ്പിച്ചത്. മുസ്ലീം ലീഗ്, ഓള്‍ അസം വിദ്യാര്‍ഥി യൂണിയന്‍, അസം ഗണപരിഷത്ത്, ഓള്‍ അസം അഭിഭാഷക അസോസിയേഷന്‍, തൃണമൂല്‍ എം പി മൊഹുവ മോയിത്ര എന്നിവരുടെ ഹര്‍ജികളാണ് പട്ടികയിലുള്ളത്.

മുസ്ലിങ്ങളൊഴികെയുള്ള എല്ലാവര്‍ക്കും പൗരത്വം നല്‍കാന്‍ ഉള്ള ചട്ടങ്ങള്‍ ഉള്‍പ്പെടുത്തി പൗരത്വ നിയമം ഭേദഗതി ചെയ്തത് ഭരണഘടനയുടെ 14-ാം അനുച്ഛേദപ്രകാരം തെറ്റാണെന്നാണ് ഹര്‍ജിക്കാരുടെ വാദം. മതപരമായി വേര്‍തിരിവ് കാണിച്ച് പൗരത്വം നല്‍കാനുള്ള നിയമം രൂപീകരിക്കുന്നത് മതേതര ഇന്ത്യയെന്ന ഭരണഘടനാ തത്വത്തിന്റെ ലംഘനമാണെന്നും ഹര്‍ജിക്കാര്‍ പറയുന്നു. ഇന്ത്യന്‍ യൂണിയന്‍ മുസ്ലീം ലീഗിനു വേണ്ടി ഹാജരായത് കപില്‍ സിബല്‍ ആണ്.