പശുകടത്തുകാരും പോലീസും തമ്മിൽ വെടിവെപ്പ്; ഒരാള്‍ കൊല്ലപ്പെട്ടു

ജയ്‍‍പൂര്‍: രാജസ്ഥാനിലെ ആള്‍വാര്‍ ജില്ലയിൽ പശുക്കളെ കടത്തിക്കൊണ്ടു പോയ സംഘവും പോലീസും തമ്മിലുള്ള വെടിവെപ്പിൽ ഒരാള്‍ കൊല്ലപ്പെട്ടു. കന്നുകാലി കടത്തുസംഘത്തിലെ അംഗമാണ് മരിച്ചയാള്‍. ആള്‍വാറിലെ ജാൻതാ കോളനിയിൽ ഇന്നു പുലര്‍ച്ചെ രണ്ടു മണിയോടെയായിരുന്നു ഏറ്റുമുട്ടലുണ്ടായത്.

അഞ്ചു പശുക്കളെ കടത്തിക്കൊണ്ടു പോയ പിക്കപ് വാൻ ശ്രദ്ധയിൽ പെട്ടതിനെത്തുടര്‍ന്ന് പോലീസ് വാഹനം നിര്‍ത്താൻ ആവശ്യപ്പെടുകയായിരുന്നു. എന്നാൽ പകരം വെടിയുതിര്‍ത്ത സംഘത്തിനു നേരെ പോലീസും നിറയൊഴിച്ചു.

സംഘത്തിൽ അഞ്ചുമുതൽ ഏഴുപേര്‍ വരെ ഉണ്ടായിരുന്നുവെന്ന് പോലീസ് പറഞ്ഞു. മരിച്ചയാളെ തിരിച്ചറിഞ്ഞിട്ടില്ല. മറ്റുള്ളവര്‍ ഓടി രക്ഷപെട്ടു. ആള്‍വാര്‍ എസ് പി രാഹുൽ പ്രകാശ് സംഭവസ്ഥലത്ത് എത്തിയിട്ടുണ്ട്.

ഗോസംരക്ഷകരും പശുകടത്തുകാരും തമ്മിൽ നിരന്തരമായ ഏറ്റുമുട്ടലുണ്ടാകുന്ന സ്ഥലമാണിത്.