രാജ്യത്തെ ആദ്യ പശുമന്ത്രിക്ക് രാജസ്ഥാനിൽ വൻ തോൽവി

ജയ്പൂർ: ഗോ സംരക്ഷണം പ്രകടന പത്രികയിൽ തന്നെ പ്രഖ്യാപിച്ചിരുന്ന രാജസ്ഥാനിൽ ബിജെപിയുടെ ആദ്യ പശുമന്ത്രിയും തോറ്റു. പതിനായിരത്തിലധികം വോട്ടിൻെറ മാർജിനിൽ സ്വതന്ത്ര സ്ഥാനാർഥിയോടാണ് ഒട്ടാറാം ദേവസി തോൽവി ഏറ്റുവാങ്ങിയത്. സിരോഹി നിയമസഭയിൽ നിന്നാണ് അദ്ദേഹം ജനവിധി തേടിയിരുന്നത്.

2013ലാണ് വസുന്ധരെ രാജെ സിന്ധ്യ മന്ത്രിസഭയിൽ ഇദ്ദേഹത്തെ മന്ത്രിയായി നിയമിച്ചത്. രാജ്യത്തിൻെറ ചരിത്രത്തിൽ തന്നെ ഗോസംരക്ഷണത്തിന് ഒരു വകുപ്പ് ഏർപ്പെടുത്തി കൊണ്ടായിരുന്നു മന്ത്രിയെ പ്രഖ്യാപിച്ചത്. പശുക്കൾക്ക് വോട്ടില്ലെന്ന ട്രോൾ സാമൂഹ്യ മാധ്യമങ്ങളിൽ പ്രചരിച്ച് കൊണ്ടിരിക്കെയാണ് പശുമന്ത്രിയുടെ തോൽവിയുടെ വാർത്തയും പുറത്ത് വരുന്നത്.

രാജസ്ഥാനിൽ ബിജെപിയെ പരാജയപ്പെടുത്തി കോൺഗ്രസ് സർക്കാർ രൂപീകരിക്കാൻ ഒരുങ്ങുകയാണ്. ശക്തമായ ജനവിരുദ്ധ വികാരമാണ് ബിജെപിയുടെ തോൽവിയിലേക്ക് നയിച്ച പ്രധാന കാരണം.