അരുണാചൽ അവിഭാജ്യഘടകമെന്ന് ചൈനയോട് ഇന്ത്യ

ന്യൂഡൽഹി: വടക്കുകിഴക്കൻ സംസ്ഥാനമായ അരുണാചൽ പ്രദേശ് ഇന്ത്യയുടെ അവിഭാജ്യഘടകമാണെന്നും അതുകൊണ്ട് ഇന്ത്യയിലെ ജനങ്ങള്‍ക്കും ജനപ്രതിനിധികള്‍ക്കുമാണ് അവിടെ പോകാൻ അവകാശമെന്നും വിദേശകാര്യമന്ത്രാലയ വക്താവ് രവീഷ് കുമാര്‍. പ്രധാനമന്ത്രി നരേന്ദ്ര മോദയുടെ അരുണാചൽ സന്ദര്‍ശനത്തെ ചൈന എതിര്‍ത്തതിനു പിന്നാലെയാണ് ചൈനയ്ക്ക് മറുപടിയുമായി മന്ത്രാലയം എത്തിയത്.

ചൈനയുടെ എതിര്‍പ്പ് അവഗണിച്ച് മോദി വ്യാഴാഴ്ച അരുണാചൽ സന്ദര്‍ശിക്കുന്നതിനിടെ അരുണാചൽ ദക്ഷിണ ടിബറ്റിന്‍റെ ഭാഗമാണെന്നും ഇന്ത്യൻ നേതാക്കളുടെ സന്ദര്‍ശനം അതിര്‍ത്തിയിലെ പ്രശ്നങ്ങള്‍ രൂക്ഷമാക്കുകയേ ഉള്ളൂവെന്നും ചൈന മുന്നറിയിപ്പ് നല്‍കിയിരുന്നു. അരുണാചൽ പ്രദേശിലെ തങ്ങള്‍ അംഗീകരിച്ചിട്ടില്ലെന്നും ഇവിടേയ്ക്കുള്ള ഇന്ത്യൻ നേതാക്കളുടെ സന്ദര്‍ശനത്തെ എന്നും എതിര്‍ക്കുമെന്നും ചൈനീസ് വിദേശകാര്യവക്താവ് ഗെങ് ഷുവാങ് പറഞ്ഞിരുന്നു.

കഴിഞ്ഞ നവംബറിൽ പ്രതിരോധമന്ത്രി നിര്‍മലാ സീതാരാമനും ഡിസംബറിൽ രാഷ്ട്രപതി റാംനാഥ് കോവിന്ദും സംസ്ഥാനം സന്ദര്‍ശിച്ചപ്പോള്‍ ചൈന രൂക്ഷമായി പ്രതികരിച്ചിരുന്നു.