ഇതര ജാതിക്കാരനെ വിവാഹം കഴിച്ചതിന് സഹോദരിയെ കൗമാരക്കാരൻ വെടിവെച്ചുകൊന്നു

ഇൻഡോർ: ഇതരജാതിക്കാരനെ വിവാഹം കഴിച്ച സഹോദരിയെ 17 കാരൻ വെടിവെച്ചുകൊന്നു. ബുൾബുൾ (21) ആണ് കൊല്ലപ്പെട്ടത്. മധ്യപ്രദേശിലെ ഇൻഡോറിനടുത്തുള്ള ഗ്രാമത്തിലാണ് സംഭവം. ഇതരജാതിക്കാരനായ കുൽദീപ് എന്ന യുവാവിനെ സഹോദരി വിവാഹം കഴിച്ചതാണ് സഹോദരനെ പ്രകോപിപ്പിച്ചത്.

ആറുമാസം മുമ്പാണ് ബുൾബുളും കുൽദീപുമായുള്ള വിവാഹം നടന്നത്. ഇത് കുടുംബത്തിന് അവമതിപ്പ് ഉണ്ടാക്കിയെന്നാരോപിച്ചായിരുന്നു കൊലപാതകം. വിവാഹ ശേഷം ഇരുവരും നാടുവിട്ടിരുന്നു. ശനിയാഴ്ച രാവിലെയാണ് ഇവർ ബുൾബുളിന്റെ വീട്ടിൽ മടങ്ങിയെത്തിയത്. എന്നാൽ സഹോദരൻ ബുൾബുളിനെ വെടിവെച്ചുകൊല്ലുകയായിരുന്നു.

വെടിവെപ്പിൽ പരിക്കേറ്റ യുവതിയെ ഉടൻതന്നെ പ്രദേശത്തെ മഹാരാജ യശ്വന്ത് റാവു ആശുപത്രിയിൽ പ്രവേശിപ്പിച്ചെങ്കിലും മരണപ്പെടുകയായിരുന്നു. ആശുപത്രിയിലെത്തിക്കുന്നതിനു മുമ്പുതന്നെ യുവതി മരണത്തിന് കീഴടങ്ങിയിരുന്നു. പ്രതി പോലീസിൽ കീഴടങ്ങി.