പാര്‍ക്ക് ചെയ്യാന്‍ സ്ഥലമുണ്ടോ, എന്നാല്‍ വണ്ടി രജിസ്‌ട്രേഷന്‍ തരാം; വേറിട്ട നിയമവുമായി ഒരു സംസ്ഥാനം

ബെംഗളൂരു: പാര്‍ക്ക് ചെയ്യാനുള്ള സ്ഥലം കാണിച്ചാല്‍ മാത്രം വണ്ടി രജിസ്ട്രേഷന്‍. മറ്റെങ്ങുമല്ല, കര്‍ണാടകയിലാണ് ഈ പുതിയ വ്യവസ്ഥ വരുന്നത്. വാഹന രജിസ്‌ട്രേഷന് പുതിയ വ്യവസ്ഥ ഏര്‍പ്പെടുത്തിയിരിക്കുകയാണ് കര്‍ണാടക സര്‍ക്കാര്‍. ഇതനുസരിച്ച്, നിലവിലുള്ള ഉടമകള്‍ക്ക് സ്ഥലം കണ്ടെത്താന്‍ രണ്ട് വര്‍ഷം വരെ സമയം ലഭിച്ചേക്കും.

രണ്ട് വര്‍ഷത്തിനുള്ളില്‍ ഉടമകള്‍ വാഹനം പാര്‍ക്ക് ചെയ്യുന്നതിനു സ്ഥലമുണ്ടെന്നു കാണിക്കുന്ന രേഖകള്‍ സമര്‍പ്പിക്കാം. രേഖകള്‍ കാണിച്ചില്ലെങ്കില്‍ വാഹന ഉടമകള്‍ ഓരോ തവണ വാഹനം പാര്‍ക്ക് ചെയ്യുമ്പോഴും പിഴ അടയ്‌ക്കേണ്ടി വരും.

സ്വകാര്യ വ്യക്തികള്‍ക്കു മാത്രമല്ല, സ്വകാര്യ ടാക്‌സികള്‍, ലോറികള്‍, കമ്പനി വാഹനങ്ങള്‍ തുടങ്ങിയവയ്‌ക്കെല്ലാം പുതിയ നിയമം ബാധകമാണ്. പാര്‍ക്കിങ് ഫീസ് ഇല്ലാത്ത റോഡുകളിലെ പാര്‍ക്കിങ് നിര്‍ത്തലാക്കാനും കരട് രേഖയില്‍ ശുപാര്‍ശ ചെയ്യുന്നുണ്ട്. ദിവസേന പുതുതായി നിരത്തിലിറങ്ങുന്ന ആയിരക്കണക്കിന് വാഹനങ്ങള്‍ സൃഷ്ടിക്കുന്ന ഗതാഗതകുരുക്കും മതിയായ പാര്‍ക്കിങ് സൗകര്യങ്ങള്‍ ഇല്ലാത്തതും ഈ പദ്ധതിയ്ക്ക് കാരണമാണ്.

കാല്‍നടയാത്രക്കാര്‍ക്കും മറ്റു വാഹനങ്ങള്‍ക്കും വളരെയേറെ ബുദ്ധിമുട്ടുണ്ടാക്കുന്നുണ്ട്. മാത്രമല്ല, മറ്റു വീടുകളുടെ മുമ്പില്‍ വാഹനങ്ങള്‍ നിര്‍ത്തിയിടുന്നതിലും പ്രശ്‌നങ്ങള്‍ ഉയര്‍ന്നിട്ടുണ്ട്.